सारा जग जीत गइली मीत रे, घरवे में हार हो गइल.

दुबे जी के एह बात के धेयान मे र‌ाखे के चाहीं कि झूठ का नीव पर बड़हन दीवाल ना बनावल जा सके. भोजपुरी आजु कवनो देश में ना त राष्ट्रभासा बिया ना ही एकरा के सरकारी कामकाज के भासा के दरजा मिलल बा. चुनौती बा कि भोजपुरी के झंडा उठवले लोग एह बात के गलत साबित करे.

रहल भोजपुरी के बीसन देस में पसार के त हम विदेश त नइखीं गइल कबो बाकिर भोजपुरी का बारे में जानकारी बिटोरे का क्रम में मारीशस, फ्रेंच गुयाना, टोबैगो, सूरीनाम, नीदरलैँड वगैरह जगहन के समाचार पत्रन के बीच बीच में देखत रहीले. भोजपुरी के सबले अधिका आ बढ़िया प्रभाव मारीशस में बा बाकिर ओहिजो भोजपुरी आम बोलचाल के भासा नइखे, सरकारी भासा के बात त दूर रहल. हँ भोजपुरी के सरकारी प्रश्रय जरुर मिलल बा ओहिजा आ भोजपुरी के बचावे बढ़ावे खातिर भोजपुरी से जुड़ल संस्थान के सरकारी सहयोग देबे के प्रावधान बना दिहल गइल बा.

भासा के लड़ाई लड़े से पहिले अपना के ओह जोग बनवला के दरकार बा. गाँड़ी मे दम ना बगइचा में डेरा वाला कहाउत पर चलला से काम नइखे चले वाला. आज भोजपुरी के एगो अखबार नइखे, कवनो पत्रिका के पसार हजार कापी से अधिका के नइखे, एकहू टीवी चैनल सुबहित नइखे चल पावत, भोजपुरी के कवनो वेबसाइट के प्रभाव नइखे भोजपुरिया लोगन पर, भोजपुरी के साहित्य भा सरोकार से केहू के मतलब नइखे. गूगल क के देख लीं कि भोजपुरी में का खोजल जाला – भोजपुरी हाॅट सांग, सेक्सी सांग, गाना, हीरो हिरोइन के तस्वीर देखला का बाद लोग का लगे समये ना बाचे कि साहित्य पढ़ो भा सरोकार के चरचा करो. एह पीड़ा के हमरा से अधिका के झेलले बा. जब अँजोरिया शुरु कइले रहीं तब दुनिया में कवनो साइट ना रहुवे भोजपुरी के. तब से ले आके आजु ले नेट पर अपना भोजपुरी साइटन के जियवले बानी त अपना बल पर. आपन पइसा लगा के, आपन जाङर खटा के. बाकिर ना त कबो आपन गोल बनावल चहनी ना ओकर कोशिश कइनी. परिणाम ई भइल कि तरह तरह के लोग आपन आपन गोल बना के आपन आपन परचम लहरावे में लागल बा. ठीक बा. करो लोग बाकिर गोलबंदी क के ना, पूरा समाज के साथे ले के चले के कोशिश करे लोग. भोजपुरी में दलित साहित्य, बाभन साहित्य, ठाकुर साहित्य, पिछड़ा साहित्य के जगहा ना होखे के चाहीं. भोजपुरी साहित्य सभकर ह, सभका के साथे ले के चले के कोशिश होखे के चाहीं. बाकिर ना, आजु गोरू माल ले अधिका खूंगा गड़ा गइल बा भोजपुरी के बथान में. पाठक से बेसी वेबसाइट हो गइल बाडी सँ.

एहसे भोजपुरी के झंडा उठा के काम करे वाला लोग पहिले भोजपुरी के कमी दूर करो, समाज में एगो बड़हन आन्दोलन खड़ा करो तब जा के भोजपुरी के जियवले राखल जा सकी. ना त लोग के मतलब सध जाई. केहू कवनो अकादमी के अध्यक्ष बन जाई, केहू कवनो दोसरा पद पर लाग जाई. ोह लोग के कमाए खाए के जरिया बन जाई बाकिर भोजपुरी के का होखी. लोग बस एही फेर में लागल रही कि पिंकिया केने बिया? केने बिया पिंकिया?

माफ करब, रउरा लेख से बड़हन टिप्पणी हो गइल. बाकिर का करीं, मन के पीड़ा बहे लागल त बहत चल गइल.

लिखत रहीं. भेजत रहीं. भोजपुरी के जियवले राखे में हर आदमी के योगदान महती बा. केहू के काम के छोट भा थोड़ ना कहल जा सके.

राउर,
ओम