भोजपुरी टीवी चैनल महुआ टीवी के कलाकार खोज अभियान के दू गो चरण पूरा हो गइल. पहली अप्रेल के लखनऊ में आ तीसरी अप्रेल के गोरखपुर में कलाकारन के हुजूम उमड़ पड़ल आडिशन देबे खातिर. आडिशन देबे खातिर लोग भीतर जाँय आ जब बहरी निकलें त केहू के चेहरा पर मुसुकी रहत रहे त केहू के चेहरा रोआइन आ लोराइल आँख. भीतर आडिशन देबे गइल उम्मीदवार जज लोग के प्रभावित करे में कवनो कसर ना छोड़त रहुवे.

महुआ टीवी के प्रोग्रामिंग हेड कमलेश कुंती सिंह के कहना रहे कि महुआ टीवी हमेशा से माटी से जुड़ल कलाकारन के बड़हन मंच देत आइल बा आ ई खोज अभियान ओही के एगो कड़ी बा जवना के शुरुआत “सुर संग्राम” से भइल आ “डांस संग्राम” से अउरी मजगर भइल. वरिष्ठ कार्यकारी निर्मात्री विनीता उपाध्याय बतवली कि एह अभियान से चुनाइल कलाकारन के महुआ के धारावहिकन में आपन कौशल देखावे के मौका दिहल जाई.

यूपी में अगिला आडिशन ६ आ ७ अप्रेल के बनारस में होखे जा रहल बा.


(स्रोत – प्रशान्त-निशान्त)

Advertisements