संसद के मानसून सत्र में घनघोर घटा गरजी

संसद का अकास पर करिया बदरी घेरले आवत बा आ बुझात बा कि घनघोर घटा गरजी आ गरज तरज का साथे कुछ छींटो पड़ी. विपक्ष एकमत बा कि महँगाई पर स्थगन प्रस्ताव ले आई आ ओकरे जरिये बहस करावल जाई. सत्ता पक्ष भरसक ई होखे ना दीहि.

दारोगे के गोली मार दिहल गइल

बिहार का रोहतास जिला के बहुआरा गाँव में शुक का दिने एगो दारोगा कमला सिंह के गोली मार के हत्या कर दिहल गइल. कमला सिंह हाजीपुर में तैनात रहलें आ छुट्टी में अपना गाँवे आइल रहन जहाँ जमीन का झगड़ा में उनकर हत्या कर दिहल गइल. पुलिस तीन जने के एह मामिला में गिरफ्तार कर लिहले बिया.

गिरफ्तार त अमितो शाह हो गइलन

सीबीआई का गिरफ्त से दूर रहल गुजरात के गृहराज्यमंत्री अमित शाह आजु सामने आ गइलन आ कहलन कि ऊ निर्दोष बाड़न. सीबीआई उनका के झूठ केस बना के फँसा रहल बिया. सीबीआई के छवि अतना खराब बा कि ओकरा पर कवनो दोष सहिये लागेला. सीबीआई के अदालत अमित शाह के चौदह दिन का न्यायायिक हिरासत में भेज दिहले बिया.

जेलो कुछ लोग खातिर सुरक्षित ना होला

मुंबई का सबले सुरक्षित मानल जाये वाला आर्थर रोड जेल में बन्द अबू सलेम के दाउद इब्राहिम के गुण्डा मोहम्मद डोसा जम के पिटाई कर दिहलसि. औकरा बाद अबू सलेम के रायगढ़ जिला के तलोजा सेन्ट्रल जेल में बेज दिहल गइल बा जवना से उनका पर फेर दाउद के कवनो गुर्गा हमला मत कर देव.

पार्टी से बाहर निकालल गइल सोमनाथ करात के दोषी बतवलन

लोकसभा के पूर्व स्पीकर सोमनाथ चटर्जी अपना आत्मकथा में वामदलन के खस्ता हाल के जिम्मेदारी प्रकाश करात पर डलले बाड़न. लिखले बाड़न कि प्रकाश करात का चलते वामपंथी आन्दोलन महत्वहीन हो गइल. सोमनाथ बाबू एगो कहाउत नइखी सुनले? बीस साल का उमिर में जे कम्युनिष्ट ना भइल ओकरा लगे दिल नइखे आ जे चालीस का बादो कम्युनिष्ट बनल रह जाव ओकरा लगे दिमाग ना होला!

दिमाग त ओकरा के कहल जाला जवन दोसरा के कामे आवे

बतावल जा रहल बा कि हिन्दुस्तान के नेशनल नॉलेज नेटवर्क से जुड़ल संस्थानन के दुनिया के विज्ञान प्रकल्पन से हाई स्पीड नेट का मार्फत जोड़ दिहल जाई. एकरा बाद वैज्ञानिक आ अकादमिक संस्थान दुनिया भर के वैज्ञानिक संसाधन के फायदा उठावे में सक्षम हो जइहें.

बाकिर एकरो से तेज त हमनी के अंधविश्चास चलेला

एगो एनजीओ कहले बा कि देश में हर साल दू सौ औरतन के डायन बता के मार दिहल जाला. सबले बेसी हत्या झारखण्ड में होला. आंध्र प्रदेश दूसरा नम्बर पर बा. सबले दुख के बात त ई बा कि अइसनका घटना के मीडियो में जगहा ना मिल पावे.

जरावल खालि डायने ना जाली स पुतलो जरावे के काम खुबे होला

अपना किहाँ जेकरा से विरोध होखे ओकर पुतला जरावे के कामो खूब होला. काल्हु पटना में जदयू आ भाजपा के समर्थक विपक्ष के पुतला जरवले. ओहलोग के शिकायत बा कि कांग्रेस आ लालू मिल जुल के चोर दरवाजा से बिहार सरकार के हटावे का षडयन्त्र में लागल बा. वइसे ई कमे होला जब सत्ता पक्ष सड़क पर उतरेला आ विपक्ष के विरोध करेला. विरोध करे के काम त विपक्षे का नामे रहे के चाही. सत्ता पक्ष के लोग त हाथी चले बाजार कूकूर भूंके हजार वाला होखे के चाहीं.

जइसे कि कॉमनवेल्थ गेम के आयोजन समिति बिया

राष्ट्रमण्डल खेल शुरु होखे में अभ दुइयो महीना नइखे रहि गइल बाकिर आयोजन के व्यवस्था के पता नइखे चलत. जस जस दिन नियरात आवत बा तस तस आयोजक लोग अउरी धीरे होखल जा रहल बाड़े. कहीं ओह लोग के नर्वस ब्रेक डाउन मत हो जाव आ पूरा दुनिया में हिन्दुस्तान के मेजबानी के मजाक उड़े लागे.

खेल का दुनिया से

आईसीसी रैंकिंग में भारत के नम्बर वन पोजीशन मजाक बन के रह गइल बा. पिछला कई गो टेस्ट मेच लगातार हरला का बादो भारत नम्बर वन टीम बनल रह गइल बा जवना पर संगकारा पिछला दिने सवाल उठवले रहलन. अब दुसरका टेस्ट में हारल त नम्बर वन पोजीशन छीना जाई.

छीना त बेचारी ज्वालो के चैन गइल बा आ ओकरा पहिले संगीता बिजलानी के जे अपना शौहर अजहर का चालचलन का खिलाफ नाराज होके मुंबई चल गइल बाड़ी. कहल जा रहल बा कि अजहर ज्वाला से इश्क फरमावत बाड़े जबकि एह बाति के खण्डन अजहर आ ज्वाला दुनु जने कई बेर कर चुकल बा. बाकिर अछरंग कई बेर अइसन चिपके ला कि हटवले ना हटे.

Advertisements