शनिचर के रात बलिया के गड़हा में गड़हा विकास मंच क तरफ से हर साल का तरह एहू साल विशाल गड़हा महोत्सव के आयोजन धूम धाम से भइल. उद्घाटन कइलन भाजपा के पूर्व प्रदेश अध्यक्ष सूर्य प्रताप शाही जे आपन उद्घाटन भाषण भौजपुरिए में दिहलन. समारोह में बलिया से सांसद सपा के नीरज शेखर आ सपा के राष्ट्रीय सचिव डा॰ राजीव राय शामिल भइलन. भोजपुरी से जुड़ल हर सभा समारोह के परंपरा बन गइल आठवीं अनुसूची में शामिल करावे के मुद्दा एहीजो उठावल गइल.

गड़हा महोत्सव के प्रचार में धूमधाम से अनेके बड़का सितारन के नाम लिहल गइल रहे खास करिके खेसारीलाल यादव के बाकिर ऊ अइलन ना आ लोग जे बा कि सगरी रात तिकवत रहि गइल खेसारी के.

समारोह में जम के गीत गवनई नृत्य के प्रस्तुति प्रदर्शन भइल. मालिनी अवस्थी एह बात पर अफसोस जाहिर कइली कि अतना महत्वपूर्ण आयोजन के अबहीं ले प्रदेश के राजकीय कार्यक्रम का सूची में शामिल नइखे कइल गइल. एह सूची में शामिल भइला का बाद आयोजन के खरचा सरकार से मिले लागेला. बतवली कि राजस्व मंत्री अंबिका चौधरी भरोसा दिहले बाड़न कि जल्दिए एकरा के राज्य सूची में शामिल कर लिहल जाई.

गड़हा महोत्सव में मालिनी अवस्थी का अलावे रवीन्द्र राजू, गोपाल रय, जयप्रकाश जिद्दी, रविरंजन, अन्नू दुबे, अंजली भारद्वाज, मुन्ना सिहं, आनंद मोहन, अजीत आनंद, शिवानी प्रिया, संगीतकार अजय सतीश वगैरह आपन प्रस्तुति दिहल लोग.

भरौली में आयोजित एह कार्यक्रम में व्यवस्था बनावे खातिर आठ थाना के थानाध्यक्ष अपना सिपाहियन का साथे तैनात रहलन जवना से भीड़ पर काबू पावल गइल ना त रहि रहि के भीड़ उमक पड़त रहुवे बैरियर फाने ला.


(अखबार से मिलल जानकारी से. फोटो दैनिक जागरण से साभार)

Advertisements