जइसे बंगाली बाला मोनालिसा आजु अपना अभिनय से भोजपुरी फिल्म इंडस्ट्रीज में आपन लोहा मनवावत आपन एगो अलगे पहचान बनवले बाड़ी वइसहीं एगो अउर बंगाली बाला आपन जलवा देखावे भोजपुरी फिल्म इंडस्ट्रीज में आइल बाड़ी. इनकर नाम हवे पूर्वा.

दुर्गापुर, वर्द्धमान, पश्चिम बंगाल के रहेवाली पूर्वा संतोष बिट के बेटी हई आ स्नातक के पढ़ाई पूरा कर के सिनेमा भोजपुरी में डेग धइले बाड़ी आपन पहिचान बनावे खातिर.

एहिजा आवे से पहिले पूर्वा अपना गुरु मदन घोष के थिएटर में दू साल ले काम कइले रहली. पूर्वा में अभिनय प्रतिभा भरपूर बा. प्रशांत नंदा के “बंधु” नाम के बंगला फिलिमो में पूर्वा अभिनय कइले रहली त निर्देशक बृजपाल के ’बिहार वाला सईंया’, राणा के ‘तोसे लागी लगन’, श्रीधर शेट्टी के ‘खूनी दंगल’ आ ‘मंगल फेरा‘ फिलिमो में पूर्वा अपना शानदार अभिनय के तारीफ करवा चुकल बाड़ी.

पूर्वा के शुरुआती सफर बहुते कष्ट वाला रहल तबो अपना इरादन पर अंडिग रहत पूर्वा आपन सपना पूरावे में लागल रहली आ आखिरकार अपना मंजिल का तरफ बढ़िए आइल बाड़ी जहाँ सभे चहुँपल चाहेला. तबहियों पूछला पर पूर्वा के जवाब इहे रहेला कि ई त बस शुरुआत ह. सफर त अबहीं बाकी बा. अबले जवन कइले बानी तवन बहुते कम बा. अबहीं त अभिनय के बारीकी सीखत आगे बढ़े के बा.

पूर्वा के इरादा सिनेमा भोजपुरी का साथही हिंदीओ सिनेमा में आगे बढ़े के बा. पूर्वा के तीन गो बड़का स्टारन संग फिलिम जल्दिए रिलीज होखे वाला बाड़ी सँ. एहमें खेसारीलाल यादव संगे ’हवा में उड़ता जाए तोहार लाल दुपट्टा मलमल के’, एक्शन सम्राट सुदीप पांडे आ विनय आनंद संगहु फिलिम आवे वाला बाड़ी सँ. कहल जात बा कि अपना अभिनय के दम पर पूर्वा जल्दिए स्टार अभिनेत्री के मुकाम हासिल कर लीहें.

पूर्वा के सपना बा कि उनुका अभिनय के वइसने तारीफ होखे जइसन काजोल के होला.


(संजय भूषण पटियाला के रपट)

Advertisements