खली के नीमन लागल बनारसी मिठाई

भोजपुरी फिलिमन के मेगा स्टार आ गायक मनोज तिवारी दुनिया भर में मशहूर मुक्केबाज द ग्रेट खली के भोजपुरी फिल्म में भूमिका करे के नेवता दिहले. पिछला दिने मनोज तिवारी ग्रेट खली का गांव घिरौना (हिमाचल प्रदेश) गइल रहले. ‘बिग बॉस-4’ का दौरान मनोज तिवारी आ खली में दोस्ती भइल रहे आ तबो मनोज तिवारी उनुका के अभिनेता बने के कहले रहले.बाकिर ‘बिग बॉस’ से बाहर भइला का बाद खली अमेरिका चल गइल रहले.

20 अक्टूबर के वापिस लवटला पर खली अपना गांवे एगो धार्मिक अनुष्ठान में शामिल होखे के मनोज तिवारी के नेवता दिहले आ मनोज तिवारी बनारसी मिठाई लिहले खली के गांव पहुंचले. ओहिजा मनोज तिवारी जागरण में भक्ति गीतो गवले. खली से नजदीकियन का बारे में बतियावत मनोज तिवारी कहले कि हमनी दुनु आदमी गाँव से उठ के ऊपर आइल बानी आ बहुते कड़ा मेहनत का बाद सफलता हाथे मिलल बा. कहलन कि दुनिया में प्रसिद्धि का बावजूद खली एकदम शांत बनल रहेले. मनोज तिवारी खली के अपना गाँवे आवहूं के नेवता दिहले बाड़े.

खली फिलिम में अभिनय का बारे में त कुछ ना कहले बाकिर मनोज तिवारी का गाँवे कबो मौका निकाल के जरूर जइहें. हो सकेला कि मनोज तिवारी जवन क्रिकेट मंदिर बनवावत बाड़न ओकरा उद्घाटन खातिर खली आवसु. मुक्केबाजी संघ से जुड़ला का बाद खली अपना गांव में 10 साल बाद दीपावली मनवले.


(स्रोत – शशिकान्त सिंह, रंजन सिन्हा)

Advertisements