भोजपुरी सिनेमा के ड्रीम गर्ल रिंकू घोष के नयी दिल्ली का द्वारिका में आयोजित छठवां विश्व भोजपुरी सम्मलेन में बेस्ट क्लासिकल एक्ट्रेस सम्मान से सम्मानित कइल गइल. सम्मान कुणाल सिहं का हाथे दिहल गइल. पू्र्वांचल एकता मंच का तरफ से आयोजित एक समारोह के संचालन मनोज भावुक आ श्वेता तिवारी कइली.

दर्शकन का दिल में जगह बना लिहली रिंकू घोष

भोजपुरी सिनेमा के अनेके हीरोइन कैरियर बनावे का फेर में देह देखाके आ ग्लैमरस अउर बोल्ड किरदार से सुर्खी बटोरे ली. कुछ फिलिमन ले त ई चलि जाला बाकिर आखिरकार टिकेला उहे जेकरा में सेक्सी लुक आ ग्लैमर का साथे-साथ अदाकारियो के क्षमता रहेला. रिंकू घोष अइसने अभिनेत्रियन में गिनल जाली. ऊ एक्सपोजर से अधिका अपना एक्टिंग से दर्शकन का दिल में अपना ला जगह बनवले बाड़ी. एह मायने में रिंकी बहुते सफल रहल बाड़ी. फिल्म ‘बिदाई’ खातिर बेस्ट एक्ट्रेस के अवार्ड मिलल त बिहारी अस्मिता सम्मानो से नवाजल गइली. दिनेश लाल यादव का साथे ‘सात सहेलियां’, रवि किशन का साथे ‘बलिदान’, पवन सिंह का साथे ‘गठबंधन प्यार के’ अउर मनोज तिवारी का साथे फिल्म ‘अंधा कानून’ के ज़रिये लाईम लाईट में बनल रहली.

एह साल भोजपुरी सिनेमा के ई ड्रीम गर्ल रिंकू घोष ‘केहू हमसे जीत ना पाई’ से मुंबई में शानदार आगाज कइली. एह फिल्म में उनुकर ग्लैमरस लुक पर हर दर्शक फिदा होके रहि गइल. रिंकू घोष के साल 2011 में आइल फिल्म ‘सईयां ड्राईवर बीबी खलासी’ बाक्स आफिस पर त ना चल पावल बाकिर उनुका अदाकारी खातिर बहुते तारीफ बटोरलसि. पहिला कवनो समीक्षा में बिहार के पत्रकार कवनो भोजपुरी फिलिम के चार गो स्टार दिहलन. चर्चित स्टार कुणाल सिंह के कहना रहल कि रिंकू घोष मौजूदा दौर के पद्मा खन्ना आ कुमकुम हई.


(शशिकांत सिंह रंजन सिन्हा के रपट से)

Advertisements

This site uses Akismet to reduce spam. Learn how your comment data is processed.