कवनो सितारा के स्टार बनावे में फिल्म वितरकन के बड़हन हाथ होला. फिलिम जतने महँग बिकाई ओकरा स्टार के ओतने रेट बढ़ी. अगर भोजपुरी फिलिमन के बात कइल जाव त भोजपुरी वितरकन के पहिला पसंद हउवन जूबली स्टार दिनेश लाल यादव ‘‘निरहुआ’’. हर टेरेटरी के बड़का से बड़का वितरक जहाँ निरहुआ के फिल्म के मुंहमांगा दाम पर खरीद के वितरित करत बाड़े ओहिजे जवन वितरक निर्माता बनत बाड़े उहो निरहुए के लेके फिलिम बनावत बाड़े.

“चलत मुसाफिर मोह लियो रे” से भोजपुरी परदा पर इंट्री मारे वाला निरहुआ के दुसरके फिल्म वितरक से निर्माता बनल आलोक कुमार के ‘‘हो गईल बा प्यार ओढ़निया वाली से’’ रहल. ई फिलिम सिल्वर जूबली हिट रहल आ फेर आलोक कुमार निरहुआ क साथे ‘‘निरहुआ चलल ससुराल’’, ‘‘हो गईनी दिवाना तोहरे प्यार में’’ जइसन सुपरहिट फिलिम बनवले. अबही आलोक कुमार निरहुआ क साथे ‘‘गंगा जमुना सरस्वती’’ आ ‘‘निरहुआ हिन्दुस्तानी’’ बनावत बाड़न.

नेपाल के प्रसिद्ध वितरक आ अब भोजपुरी के चर्चित निर्माता निदेशक रामाकान्त प्रसाद निरहुआ संगे ‘‘लागल रह ए राजा जी’’, दिवाना, दाग, दिलजले अउर खुन पसीना जइसन सुपरहिट फिलिम बनवले आ अब रामाकान्त निरहुआ संगे ‘गदर’ बनावत बाड़ें. सबले बड़का निर्माता आ बिहार के अग्रणी फिल्म वितरक अभय सिन्हा निरहुआ क साथ हम बाहुबली, परिवार, आज के करन अर्जुन, रणभूमि जइसन सुपरहिट फिलिम बनवले, ‘‘एक दुजे के लिए’’ प्रदर्शन खातिर तइयार बा आ अगस्त में अगिला फिलिम फ्लोर पर जाई.

बिहार के एगो अउर बड़का वितरक सुनील बुबना निरहुआ संगे ‘‘कहां जइबऽ राजा नजरिया लड़ाई के’’, मुम्बई के भोजपुरी के सबले बड़का वितरक राजेश-पप्पु निरहुआ संग ‘‘कसम धरती मईया के’’ बनवले आ अब ‘‘वर्दी वाला गुण्डा’’ प्रदर्शन खातिर तइयार बा. निरहुआ बिज्मेपा अध्यक्ष आ देश के बड़का वितरकन में से एक डा॰ सुनिल कुमार के फिल्मो करत बाड़े. मुम्बई आ बिहार के प्रसिद्ध वितरक बिटु सरदार निरहुआ के लेके ‘‘रिक्शा वाला आई लभ यू’’ बनावत बाड़े. एकरा अलावा निरहुआ कईगो अउरी वितरकन क फिल्म में अभिनय करत नजर अइहें.

पिछला पाँच साल से भोजपुरी के नम्बर 1 सितारा निरहुआ के फिलिम हर टेरेटरी में मुंहमांगा दाम पर बिकाले. निरहुआ भोजपुरी के एक मात्र स्टार हउवन जेकर फिलिम हर टेरेटरी, चाहे ऊ बिहार, मुम्बई, दिल्ली, यु.पी., बंगाल, नेपाल, पंजाब में से कतहीं होखो, में शानदार सफलता अर्जित करेले. दर्शकन के चहेता न॰ 1, निर्मातन के न॰ 1 आ वितरकन के पसंद नं॰ 1 निरहुआ के बेस्ट ऑफ लक !


(प्रशांत निशांत के रपट)

Advertisements