सिनेमा भोजपुरी के लक बदले आ परदा पर जलजला लावे आवत बाड़न लकी जिनकर पहिलकी फिलिम ‘लव यू सजना’ जल्दिए रिलीज होखे वाली बा. उत्तर प्रदेश के भदोही के रहे वाला लकी वइसे त मर्चेन्ट नेवी में बाड़न. बाकिर जब डांस के जुनून चढ़ल आ घर वालन से बढ़ावा मिलल त लकी डांस में जी जान लगा दिहलें. लकी के डांस देख निर्माता राजेश विश्वकर्मा उनुका के अपना फिल्म ‘लव यू सजना’ में सेकेंड लीड के किरदार दे दिहलन. अब लकी के मन एक्टिंग में रम गइल बा आ कहत बाड़ें कि साचहूं बड़ा मजा आवत बा. लकी एक्शनो कमाल के करेलें आ ओह एक्शन के एक झलक एह फिल्म में देखहू के मिली.
कृष्णा अमृत प्रोडक्शन के बैनर तले बनल एह फिल्म ‘लव यू सजना’ के निर्माता राजेश विश्वकर्मा आ निर्देशक संजय हउवें. कार्यकारी निर्माता नागेन्द्र शर्मा आ सहयोगी निर्माता नवाब विश्वकर्मा अउर सुभाष निषाद हउवें. एहमें गायक मोहन राठौड़ आ लकी के मुख्य भूमिका बा. साथ में बाड़न विरेन्द्र चौहान निरहू, नायिका बाड़ी कमसिन बाला सुमन झा, आ बाकी कलाकारन में वंदिनी मिश्रा, एयाज खान, हीरालाल यादव, दिनेश राय, किट्टू अउर प्रमोद गोस्वामी.
कहानी यतीन्द्र कुमार के लिखल, पटकथा आ संवाद अनिल विश्वकर्मा के, गीत प्यारे लाल कवि, फणीन्द्र राव अउर उमेश अनमोल के, संगीत सुनील महिपाल क जोड़ी के, मारधाड़ निर्देशन हीरालाल यादव के, कैमरामैन रविराज सिंह आ ध्वनिमुद्रक इंद्रदेव चौरसिया हउवें.
(शशिकांत सिंह रंजन सिन्हा के रपट से)