भोजपुरी में अर्थवान फिल्म बनावे खातिर मशहूर विजय लक्ष्मी इंटरनेशनल के नया फिल्म दामिनी में एगो नारी के संघर्ष गाथा बा. फिल्म के प्रस्तुतकर्ता अनिल कुमार के कहना बा कि अगर एगो औरत महतारी, बहन, बेटी, पत्नी का रुप में आपन ममता, स्नेह, प्रेम देखा सकेले त चंडी बन के रावणरुपी इंसान के तबाहो बरबाद कर सकेले. कमोबेश इहे कहानी बा दामिनी के. साथही एकरा में शादी का फेरा लेत घरी सात वचन निभावे के कइल वादो देखावल गइल बा.

Rani Chatterjee with Vinay Anand in Damini

कुली आ चाचा भतीजा के अपार सफलता से उत्साहित निर्माता डा॰सुनील कुमार के एह फिल्म में एगो अइसन औरत के कहानी बा जे अपना पति के हत्या का बाद सामाजिक बुराई आ ढकोसला से लड़त अपना पति के हत्यारन से बदला लेत बिया आ समाज के गन्दगी बनल एह रावणरुपी इन्सानन के खात्मो करत बिया.

मनोज नारायण के लिखल कहानी, श्याम देहाती के गीत संगीत का साथ राजू राम प्रधान के छायांकन से बनल एह फिल्म के निर्देशक मनोज नारायण हउवें. फिल्म में तेरह गो गाना बा जवना के कुमार शानू, विनोद राठौड़, रजनीश, इन्दू सोनाली, साधना सरगमम कल्पना, गुड्डू रंगीला, आ अलका याज्ञनिक का आवाज में रिकार्ड करावल गइल बा. फिल्म के कलाकारन में विनय आनन्द, रानी चटर्जी, विराज भट्ट, रेखा, शाहबाज खान, नारायण प्रसाद, रश्मि, उषा पौड्याल, स्वाति वर्मा के नाम बा.

फिल्म बन के तइयार बा आ ११ जून के रिलीज होखे के बात कहल जा रहल बा.


(स्रोत : रंजन सिन्हा)

Advertisements