RaviKishan-newlookहँ, ई बाति सोलह आना साच ह. इंसान के सोच, रचनात्मकता, कीर्ति आ यश रोशनी के अइसन किरण ह जवन सात समुन्दर पार ले करिया बादरन के चीरत अपना गंतव्य ले चहुँपिए जाला. बाति होखत बा भोजपुरी सिनेमा इंडस्ट्री के ओह स्टार के जे एकरा तिसरका दौर के ग्लैमरस कइलसि आ हमेशा प्रोड्यूसरन के, नयका निर्देशकन के आ जूनियर कलाकारनो के मदद करत रहेला. एह स्टार के नाम अब ले रउरो मन में आइए गइल होखी तबहियो नाम बता देत बानी. ई हउवन जाँबाज़, हरफन-मौला, सदाबहार अभिनेता रवि किशन.

भोजपुरी आ हिंदी के सैकड़ो फिलिमन में मुख्य किरदार निभा चुकल रवि किशन अब एगो मराठीओ फिलिम में मुख्य भूमिका में नजर आवे वाला बाड़न. कहे वाला इहो कहत बाड़न कि तेलगुओ सिनेमा में रवि किशन के मौजूदगी दर्ज हो गइल बा. ई खबर उनका सगरी प्रशंसकन ला गौरव के बाति बा.

फिलहाल रवि किशन लखनऊ में सलत भोजपुरी फिलिम ‘रक्त भूमि’ के शूटिंग में लागल बाड़न. एकरा बाद ‘बाज़ीगर’ फिलिम के कुछ हिस्सा के शूटिंग पूरा करइहें. तब एगो हिन्दी फिलिम के शूटिंग ला इटली जइहन. एह फिलिम के नायिका अमीषा पटेल बाड़ी. हाल के लोकसभा चुनाव मे कुछ दिन ला अझुरइला का बाद रवि किशन फेरू सिनेमा का दुनिया में व्यस्त हो गइल बाड़न आ उनका सामने फिलिमन के लाइन लागल बा.

भोजपुरी रवि किशन आ पवन सिंह के जोड़ी ले के बनल सगरी फिलिम ब्लॉकबस्टर रहल बाड़ी स. एह दुनू जने के एगो फिलिम अउर आवे वाली बा ‘योद्धा’. करीब तीन करोड़ के खरचा से बनल ई फिलिम अगिला महीना रिलीज होखे के उमेद बा.

अपना प्रशंसकन के चाहत के ध्यान राखत रवि किशन सिक्स पैक बनावे जात बाड़न. वइसे त इंडस्ट्री में रवि बाकि सभका मुकाबले बहुते सुन्दर हउवें तबहियों अपना के हमेशा फिट फाट बनवले राखे ला उ हमेशा मेहनत करत रहेले.

आजु जब हीरो बनल आसान हो गइल बा, कवनो सिंगर हीरो बन सकेला. कवनो धनपति हीरो बन सकेला तब ई याद कइल अउर जरूरी बा कि जब भोजपुरी सिनेमा गर्दिश के दौर से गुजरत रहुवे तब एकरा के ओह दौर से निकाले ला रवि किशन के कइसन योगदान रहल. रवि किशन हमेशा नयका कलाकारन के प्रेरणा बनल रहीहें काहे कि ई खांटी हीरो हउवन. चलीं हमनी सभ रवि किशन के सेहत ,सौंदर्य, आ यश के मंगल कामना कइल जाव.
(संजयभूषण पटियाला)

Advertisements