भोजपुरिया परदा के नया सितारा विराज भट्ट

भोजपुरी सिनेमा के तिसरका दौर के सफल नायकन के नाम लिहल जाव त लोकेगायकन के नाम जुबान पर आई. बाकिर आजुकाल्हु लोकगायकन से अलग एगो अउरी सितारा चमक रहल बा जवना के नाम हऽ विराज भट्ट. विराज भट्ट नेपाली सिनेमा के सुपर स्टार हउवें आ अब भोजपुरिओ सिनेमा में उनकर हैसियत स्टार वाली हो गइल बा.

विराज भट्ट के फिल्मन के बाक्स आफिस पर मिल रहल सफलता से वितरक आ निर्माता लोग के चेहरा दमकत बा. सुडौल काया आ बलिष्ठ शरीर के धनी विराज के भोजपुरी सिनेमा के राह निर्माता रामाकान्त प्रसाद अपना फिल्म “लागल रहा ए राजाजी” से देखवलें. एह फिल्म में विराज के लाजवाब अदाकारी आ हैरत अंगेज सीन देखि के सभे उनकर दिवान बन गइल. ओकरा बाद ऊ फेरु रामाकांते प्रसाद के फिल्म “दिवाना” आ “दाग” ओ में अइलें जवन ब्लॉकबस्टर साबित भइली सँ.

विराज भट्ट के सफल फिल्मन में शामिल “हम हईं हीरो हिन्दुस्तानी, जंजीर, जाबांज, जिगरवाला” का बाद “दामिनी” से मिलल सफलता एतिहासिक रहल. दामिनी करोड़ो के बिजनेस कइलस आ अबहियो ओकर कमाई जारी बा. भोजपुरी सिनेमा के एक्शन स्टार का रुप में जगह बना चुकल विराज भट्ट के झोली फिल्मन से ठसाठस भरल बा. उनकर फिल्म “आ जा ओढ़निया तान के” रिलीज खातिर तइयार बा त “दुश्मन” के शूटिंग चालू बा. “दिलजले” आ “होत बा जवानी जियान ए राजाजी” जल्दिये फ्लोर पर जाये वाली बाड़ी सँ.


(स्रोत – प्रशान्त निशान्त)