पाँच गो टेक्नीशियन के कंपनी टेक्नीशियन फिल्म्स के बनावल फिल्म छोटका भईया जिन्दाबाद अब जल्दिये रिलीज होखे जा रहल बा. आ ई शुभ काम हो रहल बा जीतेश दूबे का सौजन्य से. एकरा निर्माण के कहानी बतलावत एह फिल्म के निर्देशक जगदीश शर्मा कहलें कि एक दिन कुछ तकनीशियन उनका लगे अइलें आ आपन मनसा जाहिर कइलें कि ऊ लोग फिल्म बनावल चाहत बा. का ई संभव हो पाई? एह पर जगदीश शर्मा के जवाब रहे कि काहे ना? फिल्म पइसा से ना दिमाग से बनेला आ उनका हिम्मत बढ़वला का बाद ऊ पाँचो टेक्नीशियन मिल के आपन कंपनी बना लिहलें टेक्नीशियन फिल्म्स. तय भइल कि छोटका भईया जिन्दाबाद फिल्म बनावल जाव आ मनोज तिवारी
मृदुल के ओकर नायक बनावल जाय.
मनोजो तिवारी खुशी खुशी तइयार हो गइलें आ रानी चटर्जी के नायिका का रुप में आ टीनू वर्मा के खलनायक का रुप में ले के फिल्म निर्माण शुरु हो गइल. मनोज तिवारी के कहना बा कि ई भोजपुरी सिनेमा में एगो अभिनव प्रयोग होखी आ एकर सफलता एगो नया राह खोल दीहि.
फिल्म के वितरक बन के जीतेशो दूबे पुरा उत्साह में बाड़े. कहले कि उनका खातिर त ई खुशी के बात बा कि एह टेकनीशियन के सपना पूरा करावे के मौका मिलल बा.
(स्रोत : शशिकान्त सिंह)
Advertisements