Shashikant Singh, Film P.R.O.राज ठाकरे भलही मुंबई में भोजपुरी के विरोध करस आ ओहिजा से भोजपुरिया लोगन के भगावे के कोशिश करस सच्चाई त इ बा कि आजु भोजपुरी सिनेमा कई मराठी कलाकारन आ तकनीशियन के रोजी रोटी के जुगाड़ करा रहल बा. वर्षा उसगाँवकर, सदाशिव अमरापुरकर, मिलिंद गुणाजी, आ मोहन जोशी जइसन अनेके कलाकारन के मराठी से बेसी सहारा भोजपुरी सिनेमा से मिल रहल बा.

जानल मानल फिल्म प्रचारक शशिकान्त सिंह अनौपचारिक बात में बतवलन कि दू सौ करोड़ रुपिया के टर्न ओवर वाली भोजपुरी फिल्मोद्योग के सफलता देख मराठी फिल्म जगत भकुआइल बा. मराठी सिनेमा देखावेवाला कई गो थियेटर बन्दी का कगार खड़ा होखला का बाद भोजपुरी सिनेमा देखा के फेर से खड़ा हो गइल बाड़े. करीब चार दर्जन भोजपुरी फिल्मन के प्रचार के कमान थाम चुकल शशिकान्त सिंह कहलें कि अब मराठिये निर्माता ना साउथो के निर्माता लोग भोजपुरी फिलिम बनावल शुरु कर दिहले बा. मराठी निर्माता दीपक सावंत, अमर देवगणे आ दक्खिन के डी॰रामानायडू, बी सुब्बा रेड्डी अभ भोजपुरी मेगा स्टार मनोज तिवारी आ सुपर स्टार दिनेशलाल निरहुआ के ले के भोजपुरी आ तेलुगु में फिल्म बना रहल बाड़े.

शशिकान्त सिंह इहो बतवलन कि मुंबई में जहाँ बड़ हिन्दी फिल्मन के मुहुर्त होखल करीब करीब बन्द बा, ओहिजे सुबाष घई, एन एन सिप्पी, के सी बोकाडिया जइसन नामचीन निर्माता अब भोजपुरी फिल्म बनावल शुरु कर दिहले बाड़न आ मुंबई में हर हफ्ता नाहियो त दस गो भोजपुरी फिल्मन के मुहुर्त हो रहल बा.

[Total: 0    Average: 0/5]
Advertisements