यादवो जी के दिन फिरल

बरीसन से रितीज होखे के राह तिकवत भोजपुरी फिलिम “यादव पान भंडार” अब रिलीज होखे का लाइन में लाग गइल बा. आ एकरा साथही मनोज तिवारी लमहर दिन बाद सिनेमा का पर्दा पर लउकिहें. पीआरओ रंजन सिन्हा के भेजत एगो पोस्ट से एह बात के जानकारी मिलल बा कि भोजपुरी सिनेमा के तिसरका दौर के जनक आ लोकगायक से लोकअभिनेता आ ओकरो बाद लोक प्रतिनिधि बन गइल मनोज तिवारी के भोजपुरी फिलिम ‘यादव पान भंडार’ के रिलीज करे के तिय़ारी शुरु हो गइल बा.

श्रीकृष्णा क्रियेशन्स के बैनर तर बनल एह फिलिम के पहिलका झलकी जारी हो गइल बा जवना में मनोज तिवारी सुगापंखी रंग के बंडी पहिरले पान बेचत नजर आव बाड़न. फिलिम में उनुकर नायिका बाड़ी गुंजन पंत. फिलिम रिलिजो जल्दिए हो जाई. साल 2014 के लोकसभा चुनाव में मनोज तिवारी नॉर्थ ईस्‍ट दिल्‍ली से भाजपा के सांसद बन गइलें आ एह घरी दिल्‍ली प्रदेश भाजपा के अध्‍यक्षो उहे बाड़न. राजनीति में अइला का बाद रिलीज होखे वाली ई मनोज तिवारी के पहिलका फिलिम होखी. आ एकरा से ऊ त चरचा में अइबे करीहें फिलिमो के भरपूर प्रचार मिल जाई.

पीआरओ रंजन सिन्‍हा बतावत बाड़न कि ‘यादव पान भंडार’ एगो पनवाड़ी के कहानी ह आ एकर मुख्य किरदार बाड़ें मनोज तिवारी. करीब पाँच बरीस के अन्तराल का बाद मनोज तिवारी के कवनो फिलिम रिलीज होखे जा रहल बा. बाकिर भोजपुरी सिनेमा से उनुकर नाता कबो ना टूटल. पिछला बेर ऊ फिलिम ‘गोबर सिंह’ में नजर आइल रहलें बाकिर भोजपुरी के कईएक मंचन पर उनुकर मौजूदगी हमेशा बलन रहल बा. संसदो में ऊ भोजपुरी के आठवीं अनुसूची में शामिल करावो के आवाज उठा चुकल बाड़ें.

रंजन सिन्‍हा इहो कहलन कि मनोज तिवारी आ रानी चटर्जी स्टारर फिलिम ‘ससुरा बड़ा पैसा वाला’ से भोजपुरी सिनेमा के तिसरका दौर के शुरुआत भइल जवन अबहीं ले जारी बा. भोजपुरी फिलिम इन्डस्ट्री अब बहुते बड़ हो गइल बिया. उमीद कइल जाव कि ‘यादव पान भंडार’ से भोजपुरी सिनेमा फेरु आपन रफ्तार धरी.

श्रीकृष्णा क्रियेशन्स के बैनर में बनल ‘यादव पान भंडार’ के निर्माता जितेश दुबे आ पायल दुबे, निर्देशक अजय कुमार, गीतकार श्याम देहाती आ संगीतकार मधुकर आनन्द हउवें.

कलाकारन में मनोज तिवारी, गुंजन पंत, संजय पाण्डेय, बृजेश त्रिपाठी, सीमा सिंह, सी.पी.भट्ट, नीलिमा सिंह, रीना रानी, विकास सिंह बिरपन्न, विनोद मिश्रा, अउर बालगोविन्द बंजारा के नाम खास बा.

Advertisements