विश्व भोजपुरी सम्मेलन में भोजपुरिया डॉन

हिन्दी सिनेमा में डॉन बने वाला अमिताभ बच्चन आ शाहरुख खान का बाद अब भोजपुरी सिनेमा के मेगा स्टार मनोज तिवारी भोजपुरिया डॉन में डॉन बने जा रहल बाड़न. एह फिल्म के निर्माण राकेश कोहली आ निर्देशन रवि सिन्हा करीहें. पिछला दिने एह फिल्म के म्यूजिक अमिताभ बच्चन के जुहू आवास का लगे बनल एला बैंक्वेट हॉल में ताली के गड़गड़ाहट का बीचे जारी कइल गइल. संगीत जारी करावल गइल विश्व भोजपुरी सम्मेलन के संयोजक आ महाराष्ट्र के प्रशासनिक अधिकारी रह चुकल सतीश त्रिपाठी का हाथे. सतीश त्रिपाठी बतवलें कि अगिला महीना २१ से २३ मई का बीच आगरा में अगिला विश्व भोजपुरी सम्मेलन आयोजित होखी जवना में भोजपुरिया डॉन के स्पेशल स्क्रीनिंग करावल जाई. इहो पहिला बेर होखी कि कवनो फिल्म विश्व भोजपुरी सम्मेलन में देखावल जाई.

संगीत रिलीज का मौका पर अखबार दोपहर का सामना के संपादक प्रेम शुक्ला भोजपुरिया डॉन के जमके बड़ाई कइलन आ कहलन कि ई फिल्म भोजपुरी सिनेमा के एगो नया राह देखाई. एह मौका पर दुर्गा प्रसाद, संजय सिन्हा, मोनिका सिन्हा, राजकुमार आर पाण्डे, आनन्द गहतराज, विष्णू शंकर वेलू, प्यारेलाल यादव, श्याम देहाती, आ किशन खदरिया समेत बहुते दिग्गज मौजूद रहलें.

कहानी के कुछ कुछ संकेत देत बतावल गइल कि एह फिल्म में डॉन का पीछे २२ मुल्कन के पुलिस ना बलुक ओहिजा के डॉन पड़ीहें. सिस्टम का खिलाफ बगावत करे वाला जाबांज भोजपुरिया डॉन साबित कर देखाई कि भोजपुरिया जवान अगर अपना पर आ जाव त निमना निमना के छुट्टी करा दीहि.

एह फिल्म में मनोज तिवारी का साथे मोनालिसा, स्वाति वर्मा, निराली नामदेव, रजा मुदार, अली खान, गजेन्द्र चौहान, गोपाल राय, आ अवधेश मिश्रा के खास भूमिका बा.


(स्रोत : शशिकान्त सिंह)

Advertisements

1 Comment

  1. i filim ke muhurat 3 saal pahile bhail rahe …aur du saal se filim banke taiyaar baa… kehu kharide khaatir taiyaar naikhe .. ab music riliz kaila se sambhav ba koi kharidaar mil jai

Comments are closed.