रामपुर का वासी हूँ मैं, लक्ष्मण मेरा नाम. सीधी सादी बपली मेरी सीधा सादा काम. ई गाना आजुवो लोग का जुबान पर मौजूद बा. भोजपुरी में अब एही नाम के फिल्म बनत बा रामपुर के लक्ष्मण जवना के एन सी इन्टरप्राइजेज का बैनर में चन्दन सिंह बना रहल बाड़े आ निर्देशित करत बाड़े भोजपुरी सिनेमा के मशहूर निर्देशक हैरी फर्नाण्डीज. नाम एक भइला के मतलब ई ना ह कि एह फिल्म के ओह फिल्म से कवनो तरह के संबंध बा.
रामपुर के लक्ष्मण के शूटिंग कुछ दिन पहिले मुंबई का साकीनाका में एस जे स्टूडियो में शुरु भइल. तेरे नाम वाला गेटअप में आइल रविकिशन रवि एकदम से पुजारी बुझात रहले. उनका साथे तीन गो नायिका रहली. पहिलका संगीता तिवारी जे ए बलम परदेसी में रवि के नायिका रहली. सुसरका रहली दिव्या द्विवेदी, जे गंगा जइसन पावन पिरितिया हमार में रवि के नायिका रह चुकल बाड़ी. तीसरकी रहली अक्षरा जेकरा अभिनय कैरियर के शुरुआते रविकिशन का साथे हो रहल बा. एगो अउरी नायिका बाड़ी एह फिल्म में गुंजन पंत.
लक्ष्मण का भूमिका में रविकिशन एह तीनो सुन्दरयन का साथे किशन कन्हैया बनल रहलन. बाकिर लक्ष्मण जु्ल्मोसितम के शिकार आदमी बा जे समय के इन्तजार में बा अपना मन में धधकत बदला के आग में अपना दुश्मनन के जरावे खातिर. फिल्म के दोसर नायक बाड़न सिकन्दर खरबंदा जे पुलिस इंसपेक्टर का किरदार में बाड़े.
रामपुर के लक्ष्मण में दस गो गाना बा जवना के संगीत गुणवंत सेन दिहले बाड़े. गीतकार हउवें प्यारेलाल यादव कवि, सचिदानंद कवच, राकेश सिंह संतोषपुरी, आ श्याम देहाती.
(स्रोत : प्रशान्त निशान्त)
0 Comments