भोजपुरी सिनेमा के मेगास्टार मनोज तिवारी के गावल माता के भजन बाड़ी शेर पे सवार रुपवा मनवा मोहत बा आजुवो लोकप्रियता के चार्ट वन में बा. बतौर गायक मनोज तिवारी के पूरा दुनिया में मान सम्मान बा. हर साल नवरात्रि में उनकर गावल देवी गीत के भजन लोग हाथो हाथ खरीदेला. एह साल उनकर देवी गीत के अलबम मईया जी माफ करीं बाजार में आवे वाला बा जवना के टीसीरीज जारी कर रहल बा.

मईया जी माफ करीं अलबम के शूटिंग दिल्ली का अलावा विंध्यवासिनी देवी मन्दिर, वाराणसी, पटना, शीतला माता मन्दिर, आरा वगैरह जगहन पर करावल गइल बा जहाँ के लोकल कलाकार मनोज तिवारी के टीम का साथे एह अलबम खातिर काम कइले बाड़े. गीतकार हउवें संजय सिंह पुरी, प्रमोद पांडे, आ प्रभुनाथ दाढ़ी. अलबम के संगीत धनंजय मिश्रा के बा आ निर्देशन यशवंत सिंह के. अलबम के निर्माता हउवें विकास सिंह.

एह बारे में बतियावत मनोज तिवारी कहलें कि मनोरंजन का दुनिया में उनकर पहिला पहिचान बतौर गायक एगो देवी गीते से भइल रहुवे आ गुलशन कुमार उहे सुन के उनका के “मृदुल” उपनामो दिहले. एही चलते अपना तमाम व्यस्तता का बावजूद मनोज तिवारी हर साल देवी गीत के एगो अलबम जरुर ले आवेले अपना सुननिहारन खातिर. एह साल के देवी गीत अलबम रही देवी जी माफ करीं आ एकरा सफलता खातिर ऊ बहुते आशान्वित बाड़न.


(स्रोत : शशिकान्त सिंह)

Advertisements