भोजपुरी चैनल महुआ टीवी के रियलिटी शो डांस संग्राम में काल्हु फाइनलिस्ट प्रतिभागियन के फैसला हो गइल आ साथही तय हो गइल पश्चिम बंगाल के गौरी क्षेत्री के तीसरका जगह. एकरा साथ ही गौरी क्षेत्री के पाँच लाख रुपिया के नगद पुरस्कारो मिल गइल.

पहिला आ दुसरका जगहा आ एगारह लाख आ सात लाख के पुरस्कार खातिर पटना के आनन्द इशान आ गोरखपुर के अविनाश दूबे का बीचे मुकाबिला बा जवना के फैसला ओह लोग का परफारमेंस भा जज लोग के फैसला से ना हो के दर्शकन के वोट से कइल जाई. वोटिंग के चैनल चालू कर दिहल गइल बा. अब रउरा सभे के हाथ में बा कि केकरा के पहिला पुरस्कार मिली.

श्वेता के जाबांज टीम के योद्धा आनन्द इशान अपना मेहनत आ काबिलियत का बदौलत एह जगहा पर चहुँपल बाड़न. आखिरी चक्रव्यूह तूड़े खातिर उनकर प्रस्तुति रहुवे बौना डांस शैली में अपना चेहरा आ हाथ के छुपा के पेट पर चेहरा के आकृति आ नकली हाथ लगा के एगो अद्वितीय नृत्य. अपना नृत्य से जज सरोज खान के दिल जीतला का बाद पटना के देशरत्न मार्ग के रहवइया आनन्द अब रउरा सब से समर्थन माँग रहल बाड़न. उनका के पहिलका जगहा ले जाये खातिर रउरा JANBAZ टाईप कर के 58888 पर भेज दीं. वोटिंग २१ मई के दुपहरिया ले खुलल रही. अलबम खातिर डांस करत करत एह मंच पर आवे वाला आनन्द मुंबई में एह शो के ग्रैण्ड फिनाले खातिर अभ्यास में लागल बाड़न आ उनकर एह शो में आखिरी परफारमेंस शूक का रात ८ बजे देखे के मिली.

मुकाबिला में सम्भावना के जोशीले टीम से गोरखपुर के अविनाश दूबे बाड़न. पांचो चक्रव्यूह पार करत अविनाशो अन्तिम चक्र में आपन बेहतर प्रस्तुति दे के जज सरोज खान के खुश कर दिहलें. उहो अब अपना शूभचिन्तक दर्शकन से अपना खातिर वोट मँगले बाड़न. अविनाश के पहिला जगहा चहुँपावे खातिर रउरा JOSHILE टाईप कर के 58888 पर भेज दीं. वोटिंग २१ मई के दुपहरिया ले खुलल रही. फाइनल खातिर मुंबई में तइयारी में लागल अविनाश के पूरा भरोसा बा कि राउर वोट उनका मिली.

शो के पहिला विजेता के ट्राफी, एगारह लाख रुपया नगद, आ एगो बजाज डिस्कवर बाइक दिहल जाई. जे दूसरा जगहा पर रह जाई ओकरा साते लाख का इनाम से संतोष करे के पड़ी.


(स्रोत : प्रशान्त निशान्त)

2 thought on “डांस संग्राम के फाइनलिस्ट में पटना के आनन्द इशान आ गोरखपुर के अविनाश दूबे”

कुछ त कहीं...

This site uses Akismet to reduce spam. Learn how your comment data is processed.