मनोजो तिवारी कैद हो गइलन बिग बॉस का घर में

भोजपुरी सिनेमा के मेगास्टार कहाये वाला आ भोजपुरी के मशहूर गायक मनोज तिवारी मृदुल “कलर” टीवी चैनल पर देखावल जा रहल बिग बॉस सीजन ४ खातिर बिग बॉस का घर में कैद हो गइल बाड़न. तीन अक्टूबर के एह रियलिटी शो के शुरुआत हो गइल बा.

हिन्दुस्तान के सबले बड़ रियलिटी शो कहाये वाला बिग बॉस में मनोज तिवारी एगो खास रणनीति का तहत अपना के हिस्सा बनवले बाड़न. बतावल जात बा कि उनुका के एह शो के पहिलके सीजन से शामिल होखे खातिर तइयार करावल जात रहे बाकिर ऊ ओकर हिस्सा ना बनले. फेर सीजन टू आइल आ शिजन थ्रीओ आके चलि गइल बाकिर अबकी कुछ खास भइल आ मनोज तिवारी बिग बॉस सीजन चार के सदस्य बने के तइयार हो गइले आ अपना के बिग बॉस का घर में कैद करा लिहले.

एह शो खातिर अपना के मानसिक रुप से तइयार करे खातिर मनोज तिवारी आपन सगरी मोबाइल फोन एक हफ्ता पहिलही से बन्द कर दिहले आ एकान्तवास में चल गइले. बतावल जात बा कि एह शो का माध्यम से मनोज तिवारी बिहार आ यूपी के छवि निखारे, भोजपुरी कला आ संस्कृति के बढ़ावा देबे, भोजपुरी भाषा आ संगीत के प्रचार करे के काम करीहें. उनका माध्यम से भोजपुरी भाषा का मिठास से दुनियो परिचित होखी. कहल जात बा कि अगर भोजपुरिया लोगन के प्यार मिल गइल त अबकी के बिग बॉस भोजपुरिये होखी.

मनोज तिवारी एहसे पहिले ९ एक्स चैनल के शो चक दे बच्चे के संचालन कइले रहुवन जवन ओकर दुसरको सीजन ले कइले आ ऊ शो अपना जमाना में शिखर छू लिहले रहुवे. ओकरा बाद महुआ चैनल के सबले लोकप्रिय शो सुर संग्राम के संचालन कइले जवन आजु अपना दुसरको सीजन में लोकप्रियता के चार्ट में टॉप पर बा
आ दुसरको सीजन के संचालन उहे करत बाड़न. बिग बॉस में शामिल होखला खातिर भोजपुरी जगत उनका के बधाई दिहले बा आ खुशी से गदगद हो गइल बा.


(स्रोत : शशिकान्त सिंह)

1 Comment

  1. तीन रे महीनवा के ,मिलल वनवाशावा से
    होखिह ना तनिको ,उदाश ‘मृदुल’ भईया !
    जुझीह तुफानावा से ,बदरी बेयारावा से
    भोजपुरिया होखे ना, हताश ‘मृदुल’ भईया !
    बिग बॉस के घरवा में ,सभेके धेयानावा हो
    बनिके के निकलीह, तू खाश ‘मृदुल’ भईया !

    गीतकार :-
    ओ.पी .अमृतांशु

Comments are closed.