महुआ टीवी अपना दर्शकन खातिर ले आइल बा एगो रोमांचकारी शो जवन मनोरंजन के हर तरह के मसाला से सजावल बा. एकर सबसे बड़ खासियत एकर सामग्री बा जवना का चलते पहिला बेर भोजपुरी सिनेमा के कई गो अभिनेता अभिनेत्री एहमें शामिल बाड़े.

२५ जून से हर शुक आ शनिचर के साँझ साढ़े सात बजे से साढ़े आठ बजे ले बड़का साहब महुआ टीवी पर हाजिर रहीहन. ई ना त कपोल कल्पना हऽ ना कवनो रियलिटी शो. एकरा के नामे देबे के होखे त भोजपुरी के पैरोडी शो कहल जा सकेला जवना में बहुते तरह के फंडा देखे के मिलल करी. भोजपुरी सिनेमा के नामचीन निर्माता अभय सिन्हा आ अझय सिन्हा के बनावल ई शो एगो अइसन घर होखी जवना का हर कोना पर कैमरा के नजर रही. एगो कन्फेशनो रुम होखी. बारह गो प्रतिभागियन पर बड़का साहब के हुकुमत चली, उनकर उलटा सुलटा नियम कानून का साथ जवना के मानल पहाड़ तूड़ला जइसन मुश्किल काम होखी. जे नियम के पालन कर पाई ओकरा के त छुट्टी दे दिहल जाई बाकिर जे नियम कायदा तूड़ दी ओकरा के अंत तक ले रहे के पड़ी. बड़का साहब के एगो अउरी खासियत होखी कि जवन घटना घटी ऊ एगो स्क्रिप्ट का आधार पर घटी.

बड़का साहब के कहानी डूमरी गाँव के दबंग रईस ठाकुर के हऽ जवन अकल के कमी अपना खीस से पूरा करेला. ओकर बेटी अमेरिका से मीडिया कोर्स कर के गाँवे आवत बिया आ पापा से मुंबई चल के एगो रियलिटी शो बनावे के बात कहत बिया. अकल से कम बड़का साहब गाँवे में अइसनका शो बनावे के बात करत बाड़े आ अपना खेत में एगो सेट बनवावत बाड़न जवना में हर तरह के आधुनिक सुख सुविधा मौजूद बा. शो के नाम बड़का साहब राखल जात बा आ बेटी रिंकी ओकर मानिटरिंग करत बाड़ी.

शो में झगड़ो होत बा, शिकायतो होत बा, आ रोमांसो होत बा. सबका के मोबाइल दिहल बा जवना पर सिर्फ इनकमिंग कॉल के सुविधा बा. शो के निर्देशन अरशद खान करत बाड़े, आ कहानी के॰ मनोज सिंह के ह. शो के मुख्य पात्रन में सिकन्दर खरबन्दा, मोनिका बत्रा, उर्वशी चौधरी, श्यामली श्रीवास्तव, डॉलफिन, रानी चतुर्वेदी, रिया वालिया, दीपक सिन्हा, आनन्द मोहन, सी॰पी॰भट्ट, संतोष श्रीवास्तव, सुर्या द्विवेदी, आ टाईटल भूमिका बड़का साहब का रुप में गजेन्द्र चौहान बाड़े. अलगा अलगा एपिसोड में भोजपुरी सिनेमा के मशहूर चेहरो नजर आई लोग.

एह मंगल के एह शो के मुंबई में एगो भव्य समारोह में लाँच कइल गइल जहवाँ बिग बॉस से चरचा में आइल भोजपुरी के सदाबहार सुपर स्टार रविकिशन, भोजपुरी के हेलेन सभावना सेठ, भोजपुरी लोकगायक आ मेगास्टार मनोज तिवारी, अभिनेता सिकन्दर खरबन्दा, प्रवेशलाल यादव, अभिनेत्री उर्वशी चौधरी, निर्माता के सी बोकाडिया, सुनिल दर्शन, टीपी अग्रवाल, मशहूर वितरक डा॰ सुनील, निर्माता अशोक गुप्ता, असलम शेख, अनंजय रघुराज, महुआ टीवी के उर्मिका राय, विनीता, इ शंकर समेत अनेके जानल मानल लोग मौजूद रहुवे.


(स्रोत : प्रशान्त निशान्त)

Advertisements