– अक्षय कुमार पाण्डेय
आन्हीं में, पानी में, जरत रहे दिया,
हिया माने ना हार, जिया ठाने ना रार –
तोंहे गीत कऽ कसम.
धीरे धीरे जमल अन्हार कुल्ह पघिल जाई
सोन किरिन आके जब धरती से मिल जाई.
चढ़ ऊपर, ऊपर चढ़, थाके ना जोर –
तोर पीठ पर पहाड़, पेट रहे ना उघार –
तोंहे गीत कऽ कसम.
गाँधी क मुरुती पर बाज एगो बइठल बा,
बगिया में अजगर फेरु आजु एगो पइठल बा,
बिहँसे दिन, फूल खिले छाँट कूस काँट –
बाँटऽ अमरित क धार, मिले भले ना दुलार –
तोंहे गीत कऽ कसम.
नइया के पेंनी में छेद हो रहल बाटे,
नदी के अरार पर सियार रो रहल बाटे,
लहरन के घात समुझ मानऽ तू बात –
हाथे ले के पतवार यार समय के सम्हार –
तोंहे गीत कऽ कसम.
संपर्क सूत्र :
ग्रा॰ पो॰ – रेवतीपुर रंजीत मोहल्ला, जिला – गाजीपुर 232328 मोबाइल – 09450720229
Full masti