टटका खबर : 10 अक्टूबर 2014, शुक

भारत से फायरिंग रोके के अपील कइलन नवाज शरीफ

• आजमगढ जिला के बरदह इलाका में एगो औरत के लाश कोठरी में लटकत मिलल. नइहर के लोग ससुरालियन प दहेज हत्या के केस कइलन.
• रोहतास जिला के डालमिया नगर इलाका में आजु कुछ बदमाश एगो शिक्षक से डेढ़ लाख रूपिया लूट लिहले.
• इलाहाबाद उच्च न्यायालय आगरा से नोएडा तक जाए वाला यमुना एक्सप्रेस वे के टोल फ्री करे के माँग करे वाली याचिका खारिज कर दिहलसि.
• कांग्रेस मोदी सरकार पर मनरेगा के कमजोर करे के आरोप लगावत कहलसि कि एहसे गाँव के लोग में बेरोजगारी बढ़ जाई.
• लोक जनशक्ति पार्टी कहलसि कि झारखंड मे विधानसभा के चुनाव ऊ भारतीय जनता पार्टी संगे गठबंधन क के लड़ल चाही.
• पटना में विजयादशमी का दिने भइल भगदड़ में मरे आ घवाहिल होखे वाला लोग खातिर अनुग्रह राशि आजु प्रधानमंत्री नरेंद्र मोदी का कार्यालय से जारी क दिहल गइल.
• उत्तर प्रदेश के जौनपुर जिला के सदन तहसील इलाका के निवासी आ आजादी के लड़़वैया रहल पंडित हरदेव मिश्र के आजु साँझ निधन हो गइल.
• उत्तर प्रदेश में गोरखपुर जिला के गुलहरिया इलाका में काल्हु रात कुछ बदमाश एगो सर्राफा व्यवसायी से लाखों रुपिया के गहना आ नगदी लूट लिहले.
• गोण्डा के कर्नलगंज इलाका में एगो जीप का चपेटा में पड़ के एगो मोटरसाइकिल सवार नवही मर गइल आ दू जने घवाहिल हो गइले.
• उत्तर प्रदेश के मुख्यमंत्री आ सपा के प्रदेश अध्यक्ष अखिलेश यादव के कहना बा कि गंगा सफाई अभियान का पीछे राजनीति आ सांप्रदायिक एजेंडा बा. जाने जोग बा कि गंगा के हिन्दू लोग पूज्य मानेला आ सपा मुसलमान वोट खातिर लागल रहेले.
• उत्तर प्रदेश के माध्यमिक शिक्षा मंत्री महबूब अली कहले बाड़न कि माध्यमिक शिक्षा परिषद के परीक्षा में नकल ना होखे दिहल जाई. जबकि नकल विरोधी कानून के सपा मुखिया मुलायमे सिंह खतम कइले रहन.
• बिहार के भोजपुर जिला के सिकरहटा इलाका के कुरमुरी गांव में दू दिन पहिले भइल पाँच गो महादलित औरतन से बलात्कार का मामिला में दू जने के गिरफतार कइलसि पुलिस.

टटको में टटका आज के खबर पढ़ीं…..