सूअर-ज़ुकाम (स्वाइन फ्लू)
डा॰कमल किशोर सिंह
कइलस बड़ी परेशान हो, ई ससुरा सुअर -ज़ुकाम.
मुंह प जाब लगा लोग घुमे ,दूर से करे सलाम हो -ई ससुरा --
बुढ-पुरनिया, कम पकड़इलन, धइलस लड़िका जवान,
कतना के खटपारू कइलस, दुहलस कतना ई जान हो - ई ससुरा --
उत्तर दक्खिन, पूरब पछ्छिम, पसरल सकल जहान.
प्रेस रिपोर्टर थाकत नइखन छापत एकर दास्तान हो - ई ससुरा --
स्कूल कॉलेज, दफ्तर, सबकर, कइलस चक्का जाम,
मने मने गाजस सगरी डॉक्टर, भभकल दवा दूकान हो - ई ससुरा --
टी.बी., एड्स, मलेरिया पर से छटकल सबकर ध्यान ,
सब सरकार चलावे लगली, एकरे बचाव अभियान हो - ई ससुरा --
रिवरहेड, न्यूयार्क
