डांस संग्राम में कॉमेडी के तड़का
महुआ टीवी पर देखावल जा रहल रियलिटी शो डांस संग्राम में एह हफ्ता डांस का साथे साथ कॉमेडियो के तड़का के आनन्द उठावे के मिली. एह हफ्ता शनिचर का रात आठ बजे डांस संग्राम का मंच पर अपना कॉमेडी अन्दाज के जलवा बिखेरे अइहन भोजपुरिया स्टार विनय आनन्द. मकसद रही रियलिटी शो गृहलक्ष्मी के एह शो का मार्फत प्रोमोट करे के. मंच पर आवते विनय आनन्द भोजपुरिया स्टाइल में दर्शकन के सलामी ठोकिहन आ फेर अपना अन्दाज में प्रतिभागियन के तारीफ कइल शुरु करीहें. एगो प्रतिभागी अमित का साथे विनय आनन्द ठुमको लगइहें.
डांस संग्राम के एह एपिसोड में सगरी प्रतिभागी अपना ठुमका से नृत्य के महागुरु सरोज खान, विनय आनन्द आ दुनु टीमन के कप्तानिन श्वेता तिवारी आ संभावना सेठ के प्रभावित करे का साथ साथ हँसावहू के कोशिश करीहें. निग्रो का लुक में धमाल मचावे वाला परफारमेंस दे के अविनाश दर्शकन आ जज लोग के दिल जीत लीहें. आत्मजीत का शानदार नृत्य से उत्साहित हो के संभावना सेठ उनका के गले लगा लीहें.
सबसे आखिर में विनय आनन्द आ शो के एंकर दिनेशलाल यादव निरहुआ धमाल मचावे वाला ठुमका लगइहें. त याद बा नू डांस संग्राम के समय ? हर शुक आ शनिचर रात आठ बजे से महुआ टीवी पर.
स्रोत : प्रशान्त निशान्त