आन्हर कुकुर बतासे भूंके.

by | Dec 7, 2011 | 2 comments

(बतकुच्चन – ३७)

आन्हर कुकुर बतासे भूंके. भोजपुरी के ई कहाउत पिछला दिने तब याद आ गइल जब देश के एगो बड़का मंत्री इन्टरनेट के सोशल मीडिया का खिलाफ आग उगिले लगलन. कहे लगलन कि ओहिजा जवने मन में आवत बा लोग लिख देत बा. देखा देत बा. अरे भाई त एने ओने तकला झँकला के जरूरत का बा ? रउरा के जनता अगोरिया बना के भेजले बिया अगोरे खातिर आ रउरा अपना के मिलल ताकत से अतना अगरा गइनी कि अगोरे का बदले लगनी अगोटे ! ई ना सोचनी कि रउरा कहला का बाद ढेरे लोग ओह फोटो, ओह साईटन के देखे लागल जेकरा के रउरा लुकावल चाहत रहनी, दबावल चाहत रहनी. आ अब ऊ सगरी बात सभे जान गइल जवना के रउरा ना जनावल चाहत रहनी. नचनिया त आपन गाना गावत रहल कि कह देब हो राजा रात वाली बतिया. आ रउरा समुझनी कि ओकरा ऊ बाति मालूम हो गइल जवन रउरा सभका से लुका छिपा के कइले रहीं. आ बक दिहनी कि का कहबू इहे नू कि रात बगइचा में टट्टी पर गिरल अमरूद खइले रहीं !
खैर बात बहकि गइल. आजु के बतकुच्चन में जवन शब्द चरचा में अइले सँ ओह अगोरल, अगोटल, अगराइल आ अगोरिया पर लवटल जाव. कवनो बात पर खुश भइला भा इतरइला पर आदमी अगराइल हो जाला, अगराये लागेला. आ बिना बात के भा आधार के अगराइल आदमी के घमंडी समुझल जाला. अगोरिया ओकरा के कहल जाला जे अगोरत होखे, पहरेदारी करत होखे. बाकिर कवनो बात के, केहू के इंतजारो कइल अगोरल कहल जाला. अगोरत बानी कि बबुआ कब ले अइहें. आ अगोटल बकोटल जइसन काम हऽ. रोकल, घेरल, छेंकल के अगोटल कहल जाला. आ कवनो बात के सकारलो के. सकार लिहनी मतलब कि घेर लिहनी रोक लिहनी ओह बात के आगा बढ़े से. बाकिर एह अगोरिया मंत्री जी के इरादा सकारे वाला ना हो के घेरे वाला, रोके वाला बा. ऊ चाहत बाड़न ओह पर सेंसर लगावे के जवना पर कवनो सेंसर लगावल कवनो सरकार के बूता के बाहर बा. बतास के केहू बान्हि पवले बा का ? बतास त हवा ह, हनहनात रही. एने से घेरब त लोग ओने से जाये लागी. दुनिया के बहुते तानाशाह लोग इन्टरनेट पर काबू पावे के बेकार कोशिश कइले बा. रउरो कर के देख लीं. आदमी के आजादी के प्रतीक बन गइल बा इन्टरनेट. एह बतास के रोके के बा त सगरी खिड़की दरवाजा बन्द कर लीं. गैरकानूनी काम बात रोकल दोसर चीज ह आ विवाद विचार रोकल दोसर. अगर कहीं कुछ गैर कानूनी होखत बा त आराम से रोकीं बाकिर विवाद आ विचार के रोके कोशिश जन करीं. अनेरे लोग बुड़बक बताह कहे लागी.

Loading

2 Comments

  1. OP_Singh

    चंदन जी,

    हर बतकुच्चन का बाद रउरा प्रतिक्रिया के इन्तजार रहेला.

    खुशी त एह बात के बा कि अकसरहाँ रउरा बाति से हम सहमतो रहीले. रहल बाति बिखराव के त रउरो ई बाति मानब कि हर हफ्ता कुछ नया लिखल जवना के शब्द सीमा बान्हल होखे ओतना आसान ना होला. दोसरे बतकुच्चन के सुभाव कुछ अइसन बा कि सामयिक रखला के कोशिश का बादो एकरा के समसामयिक बनवले राखे के कोशिश करीलें.

    कहल गइल बा कि “राग रसोई पागड़ी कबो कबो बन जाय”. हर बेर लेख बढ़िये लिखा जाव संभव ना होला. कबो कुछ काम के दबाव त कबो कवनो कारण से अनसाइल मन, ओह पर से निर्धारित तिथि ले सामग्री पठा दिहला के दबाव सब कुछ मिला जुला के अइसनका होत रहेला.

    धन्यवाद दिहले के साथ,
    राउर
    ओम

  2. चंदन कुमार मिश्र

    आच्छा। ऊहो परयास क लेस। इनको हाल त ऊहे होखे के बा। बतकुच्चन में अबहीं एगो मजा त आवता बाकिर एको बिखराव के दर्सन होत रहSता।

Submit a Comment

This site uses Akismet to reduce spam. Learn how your comment data is processed.

अँजोरिया के भामाशाह

अगर चाहत बानी कि अँजोरिया जीयत रहे आ मजबूती से खड़ा रह सके त कम से कम 11 रुपिया के सहयोग कर के एकरा के वित्तीय संसाधन उपलब्ध कराईं. यूपीआई पहचान हवे - सहयोग भेजला का बाद आपन एगो फोटो आ परिचय
anjoria@outlook.com
पर भेज दीं. सभकर नाम शामिल रही सूची में बाकिर सबले बड़का पाँच गो भामाशाहन के एहिजा पहिला पन्ना पर जगहा दीहल जाई.
अबहीं ले 13 गो भामाशाहन से कुल मिला के सात हजार तीन सौ अठासी रुपिया (7388/-) के सहयोग मिलल बा. सहजोग राशि आ तारीख का क्रम से पाँच गो सर्वश्रेष्ठ भामाशाह -
(1)
अनुपलब्ध
18 जून 2023
गुमनाम भाई जी,
सहयोग राशि - एगारह सौ रुपिया

(3)

24 जून 2023 दयाशंकर तिवारी जी,
सहयोग राशि - एगारह सौ एक रुपिया
(4)
18 जुलाई 2023
फ्रेंड्स कम्प्यूटर, बलिया
सहयोग राशि - एगारह सौ रुपिया
(7)
19 नवम्बर 2023
पाती प्रकाशन का ओर से, आकांक्षा द्विवेदी, मुम्बई
सहयोग राशि - एगारह सौ रुपिया

(11)
24 अप्रैल 2024
सौरभ पाण्डेय जी
सहयोग राशि - एगारह सौ रुपिया

पूरा सूची
एगो निहोरा बा कि जब सहयोग करीं त ओकर सूचना जरुर दे दीं. एही चलते तीन दिन बाद एकरा के जोड़नी ह जब खाता देखला पर पता चलल ह.

संस्तुति

हेल्थ इन्श्योरेंस करे वाला संस्था बहुते बाड़ी सँ बाकिर स्टार हेल्थ एह मामिला में लाजवाब बा, ई हम अपना निजी अनुभव से बतावतानी. अधिका जानकारी ला स्टार हेल्थ से संपर्क करीं.
शेयर ट्रेडिंग करे वालन खातिर सबले जरुरी साधन चार्ट खातिर ट्रेडिंगव्यू
शेयर में डे ट्रेडिंग करे वालन खातिर सबले बढ़िया ब्रोकर आदित्य बिरला मनी
हर शेेयर ट्रेेडर वणिक हैै - WANIK.IN

Categories

चुटपुटिहा

सुतला मे, जगला में, चेत में, अचेत में। बारी, फुलवारी में, चँवर, कुरखेत में। घूमे जाला कतहीं लवटि आवे सँझिया, चोरवा के मन बसे ककड़ी के खेत में। - संगीत सुभाष के ह्वाट्सअप से


अउरी पढ़ीं
Scroll Up