जीवदानी सिनेविजन के बैनर में बी॰वी॰गवाड के बनावल आ दुर्गा मईया के भक्ति पर आधारित कहानी वाली भोजपुरी फिल्म “कसम दुर्गा मईया के” अब रिलीज खातिर तइयार बा. फिल्म के नायिका राधा बियाह के तीन साल बादो महतारी बने खातिर तरसत बाड़ी. डाक्टर कह देता कि ऊ कबहियो महतारी नइखी बन सकत. एह दुख से टूटल राधा मन्नत मानत बाड़ी कि अगर ओकर गोदी भड़ गइल त ऊ दु्गा माई के मन्दिर बनवाई. माँ के कृपा से राधा महतारी बन जात बाड़ी. ओकरा बाद मंदिर के बनावे के काम शुरु होखत बा बाकिर जवना जमीन पर मंदिर बने जा रहल बा तवना पर एगो उद्योगपति नजर गड़वले बा. अइसनका में का मंदिर बन पावत बा एकर जवाब फिल्म देखले पर मिली. फिल्म के कलाकारन में नरेश कनोडिया, हितू कनोडिया, पूर्वी जानी, श्रीकांत सोनी, विशाल पुवार, जीतू पाण्ड्या, मीनाक्षी, शरद शर्मा, वीर महेन्द्र आ खलनायक का भूमिका में बलराम बाड़े. संगीत इकबाल दरबार, सिराज मेनन, आलमगीर खान आ अमन श्लोक के बा. गीत अरविन्द तिवारी आ अशोक सिन्हा के, कथा पटकथा राजन प्रभू आ जय पंड्या के, संवाद मंगल बिहारी के लिखल बा. नृत्य निर्देशक निक्की बत्रा, एक्शनमास्टर मसूद पटेल, कैमरामैन सी॰ जगन आ सह निर्माता स्वप्निल गवाड़ हउवें. फिल्म एही महीना रिलीज हो रहल बा. मुंबई में एह फिल्म के वितरक दिलसा डिस्ट्रीब्यूटर बाड़े.
(स्रोत – समरजीत)
