एकजुटता के कमी

दुबे जी,

रउरा एह लेख में समस्या आ हालात के सही आकलन नइखे लउकत. भोजपुरी के जनमानस ले चहुँपावे के काम सिनेमा ना कइलसि, ऊ त एकरा के कमाए खाए लायक भासा बनावे के काम कइलसि. भोजपुरी के जिअवले राखे में करोड़ो भोजपुरियन के योगदान बा. भोजपुृरी सिनेमा के लोग त एकरा से कमाई करे खातिर जुड़ल. भोजपुरी के विकास आ पहचान खातिर कवनो एगो नाम भा आदमी का भरोसे रहल नुकसानदेह होखी. हमरा नइखे मालूम कि रउरा मनोज तिवारी खातिर अतना मेहरबान काहे बानी.

भोजपुरी सरोकार के बात करत घरी भोजपुरिका पर भा सिनेमा के दोसरा साइटन पर छपे वाली प्रचार सामग्री का तरह केहू के जयकारा कइला के कवनो जरुरत नइखे. बात भोजपुरी के करीं. एकओर ओलरला से बात खराब होखी. मनोज तिवारी पर हमरो नजर बा बाकिर भाजपा के सांसद का नाते मनोज तिवारी के कतना बेंवत भा आजादी बा एकर कुछ अंदाजा हमरो बा. ओहिजा मनोज तिवारी जइसन करीब तीन सौ से बेसी सांसद बाड़े. कुछ लोग शुरू से ले के आजु ले संघ आ जनसंघ से जुड़ल रहल बा आ कुछ लोग समय समय पर बहुते घर के खाना खा के एहिजा ले आइल बा.

हमेशा धियान राखीं कि आदमी आजु रही काल्हु ना रही. आजु एह पाला में बा काल्हु ओह पाला में बइठल भेंटाई. बाकिर विचार भा भासा के लड़ाई हर हालत में चलावत रहे के पड़ी. एहिजा दुष्यंत कुमार के हिन्दी गजल के कुछ पंक्ति रेघरियावे से नइखीं रोक पावत कि –

सिर्फ हंगामा खड़ा करना मेरा मकसद नहीं,
मेरी कोशिश है कि यह सूरत बदलनी चाहिए.
मेरे सीने में न सही, तो तेरे सीने में सही,
हो कहीं भी आग लेकिन आग जलनी चाहिए.

अँजोरिया आ भोजपुरिका आजु ले हर भोजपुरिया के साथ दिहले बा, सभकर बड़ाई करत आइल बा, सभका के प्रचार देत आइल बा बाकिर केहु के पिछलगुआ नइखे बनल, ना बन सकेले. आ हम रउरा के प्रचारक नइखीं मानत, एही से अतना कुछ लिख दिहनी. अगर प्रचारक हईं त हम आपन बात वापस लेत बानी, लागल रहीं.
राउर,
ओम