भोजपुरी के बढ़त लोकप्रियता देखत एह भाषा में चैनलो के संख्या बढ़े लागल बा. महुआ टीवी, संगीत भोजपुरी, मैजिक टीवी, हमार टीवी, का बाद अब हमनी भोजपुरिया नाम के टीवी चैनल के शुरुआत होखे जा रहल बा. हमनी भोजपुरिया के चलावे वाली कंपनी एचवी इन्टरटेनमेंट प्रा॰लि॰ के जीएम संजय कुमार का हवाले से ओकर मुख्य जनसंपर्क अधिकारी रंजन सिन्हा खबर दिहले बाड़न कि एह चैनल के शुरुआत जल्दिये होखे जा रहल बा. चैनल के खासियत बतावत कहल गइल बा कि चैनल का कार्यक्रम में भोजपुरिया माटी के खूशबू रही आ भोजपुरी सभ्यता संस्कृति के बाति होखी बालीवुड के तड़का मरला बिना. चैनल के कोशिश बा कि एकर कार्यक्रम स्थानीय कलाकारन से तइयार करावल जाव आ एही दिशाईं ओकर काम चल रहल बा. अधिकतर कार्यक्रम के शूटिंग बिहारे में करावल गइल बा.
चैनल के सूचना में बतावल गइल बा कि ओकरा कार्यक्रम के निर्माण में अपूर्वा फिल्म्स के संजय सिन्हा आ मोनिका सिन्हा समेत राजेश राज, उमेश सिंह, धीरज कुमार, महेन्द्र कुमार, मिली श्रीवास्तव, कुन्दन किशोर, डॉलर पटेल, साहिल मिश्रा, अर्जुन सिंह, राकेश भदौरिया, विनोद कुमार, अनिकेत मिश्रा वगैरह निर्माता निर्देशक लोग के जोड़ल गइल बा.
बाकिर सूचना में अबहीं एकर संकेत नइखे दिहल गइल कि चैनल के वितरण कवना माध्यम से होखी. अबहीं ले बहुते डिश टीवी सेवा में भोजपुरी के बाकी चैनल शामिल नइखीं हो पावल सँ. महुआ चैनल बिग टीवी आ टाटा स्काई के ग्राहकन खातिर उपलब्ध बा जवना चलते ओकर दर्शक सुविधा से चैनल देख पावेलें. एहू पर ध्यान दिहल जरुरी बा काहे कि अखबार निकालल ओतना मुश्किल काम ना ह जतना मुश्किल ओह अखबार के वितरण व्यवस्था बनावल. नया नया मुर्गा के सगरी वितरक हलाल करे में जुट जालें आ पुरनका अखबारो नयका खातिर मुश्किल पैदा करेलें.
0 Comments