पवन सिंह के मतलब हिट पर हिट

भोजपुरी सिनेमा के सुपरस्टार पवन सिंह के जादू दर्शकन का कपारे चढ़ के नाचत बा तबहिये त उनकर हर फिल्म हिट हो जात बा. अबही के आलम ई बा कि एह साल पवन सिंह के के सगरी फिलिम हिट हो गइल बाड़ी सँ. साल के शुरुआत में रिलीज जब केहू दिल में समा जाला कमाल के सफलता दर्ज कइलस आ बाक्स आफिस पर सुपर हिट रहल. फेर आइल देवरा बड़ा सतावेला. एह फिल्म में पवन सिंह रविकिशन का साथे अइलें आ ई जोड़ी डबल सफलता पा गइल. बिहार के दर्जन भर सिनेमाघर में ५० दिन तक लगातार चलल आ अब यूपी में रिकार्ड सफलता पा रहल बा. पिछला महीना रिलीज प्यार बिना चैन कहाँ रे ओ के बाक्स आफिस पर धूम मचल बा. करीब २५ सिनेमाघर में चल रहल एह फिल्म के व्यवसाय रिकार्डतोड़ चलत बा. एह फिल्म के महिला दर्शक खूबे पसन्द कर रहल बाड़ी.

एह तीनो का अलावे पवन सिहं के एगो अउरी फिल्म निर्माता संदीप श्रीवास्तव के सईयां के साथ मड़ईया में बिहार के तीस गो सिनेमाघर में हाउसफुल कलेक्शन ले आ रहल बा. टिकट के कालाबाजारी चल रहल बा. एह फिल्म के मिलल सफलता पवन सिंह के फैन फालोइंग देखावत बा. अब पाँच महीना में चार गो हिट देख के इहे नू कहल जाई कि पवन सिहं हिट पे हिटे के नाम हऽ.

(स्रोत : प्रशान्त निशान्त)