चर्चित निर्माता डा॰सुनील कुमार के फिल्म दामिनी के मिलल अपार सफलता आ बम्पर ओपनिंग विनयो आनन्द के भोजपुरी सिनेमा के सुपर स्टारन का कतार में ले आ के खड़ा कर दिहलस. फिल्म में विनय आनन्द के अभिनय आ उनका पर फिल्मावल गीतन के जम के तारीफ हो रहल बा.
Vinay Anand and Rani Chatterjee in Bhojpuri Film Damini
वइसे त विनय आनन्द अपना पहिलके फिल्म चाचा भतीजा से सुपर स्टार का कतार में शामिल हो गइल रहलें बाकिर बाद में उनका कुछ गलती का वजह से उनका से ई पदवी छीना गइल रहे. अब दामिनी उनका के फेर से मौका दिहले बिया. इहो संजोगे बा कि चाचा भतीजा फिल्मो के निर्माता डा॰सुनीले रहलें जिनकर निर्माण दामिनी हवे.

अब बड़का निर्माता विनय आनन्द के चक्कर लगावे लागल बाड़न बाकिर विनय आनन्द फेर ऊ गलती दोहरावल नइखन चाहत जवन पहिला बेर कइले रहन. अपना कैरियर के सँवारे खातिर ऊ डा॰सुनील के जम के तारीफ करत कहलन कि डा॰सुनील एगो हरफनमौला इंसान हउवें जिनका फिल्म निर्माण आ ओकरा सफलता खातिर जरुरी हर चीज के भरपूर जानकारी बा. विनय आनन्द इहो कहलन कि ऊ कबो मनोज तिवारी, रविकिशन, भा निरहुआ के बराबरी ना कर सकस. ई सब लोग उनका बड़ भाई जइसन बा. कहलन कि दस हजार लोग का कार्यकुशलता से आजु भोजपुरी सिनेमा तरक्की कर रहल बा आ उनको जिम्मेदारी बढ़ गइल बा. जब दर्शक उनका से आशा करत बाड़े त उनको दायित्व बा कि ऊ भोजपुरी सिनेमा के बेहतरी खातिर काम करस.

विनय आनन्द भलही हिन्दी फिल्म का बाद भोजपुरी में अइले बाकिर उनका पहिचान मिलल भोजपुरिये सिनेमा से. बिहार आ यूपी के दर्शकन के तहे दिल से धन्यवाद करत विनय आनन्द कहलन कि ई दर्शक उनका खातिर भगवान जइसन बाड़े. पिछला शुक के रिलीज भइल दामिनी एकतालिसो जगहा से सौफीसदी कलेक्शन कर देखवलस आ हर वर्ग के दर्शक फिल्म के सराह रहल बाड़े.


(स्रोत : शशिकान्त सिंह आ रंजन सिन्हा)

Advertisements

This site uses Akismet to reduce spam. Learn how your comment data is processed.