राधिका क्रिएशन के बैनर में बनत भोजपुरी फिलिम ‘कानून और अपराधी’ के शूटिंग पूरा हो गइल बा आ अब एकरा बैकग्राउण्ड म्यूजिक पर काम चलत बा. एकर निर्माता हउवन अशोक कुमार आ लेखक-निर्देशक बिरेन्द्र पासवान. बिरेन्द्र पासवान एहसे पहिले ‘नौटंकी’, ‘नजरिया काहे लड़वलऽ’ जइसन भोजपुरी फिलिम निर्देशित कर चुकल बाड़े. आ ‘एगो चुम्मा दे दऽ राजा जी’, ‘गांव की ओर’, ‘तोहार अंखिया दिवाना बना दिहले बा’ वगैरह के कहानी लिखले बाड़न.
‘कानून और अपराधी’ ओह लोग के खिलाफ एगो जंग बा जे एह सोना जइसन देश के दीमक जइसन चाट जाए चाहत बाड़े, जिनका चलते इन्सानियत बेआबरू होखत बिया. कानून ओह लोग का बीच धूरा बन गइल बा आ पुलिस के वर्दी उनकर गुलाम. एही से जुल्म का दुनिया के बेताज बादशाह बनल राणा के खिलाफ जंग के ऐलान करत बा कानून के रखवाला कुंदन. बाकिर अफसोस कि अपने वर्दीधारी सिपाहियन का चलते ऊ राणा का जाल में फँस जात बा आगे का होखत बा से फिलिम के क्लाईमेक्स बा.
बहरहाल एह फिलिम फिल्म में नवोदित अभिनेता धीरज कुमार, शबनम पाटिल, अशोक कुमार, विजय सिंह, राजकुमार पाण्डे, डा. सुदर्शन, सुरेन्द्र आ बृजमोहन के मुख्य भूमिका बा. संगीतकार हउवें अजय प्रसन्ना, कोरियोग्राफर संतोष कुमार, एडीटर दीपक सिन्हा आ कैमरामैन जानू.
(समरजीत)
