गोरखपुर में गुण्डईराज का चलते रात भर जगले पवन सिंह

भोजपुरी सिनेमा के सुपरस्टार पवन सिंह एह घरी अपना काम का प्रति पूरा तरह से समर्पित हो गइल बाड़न आ अपना निर्माता के सुविधा आ सिनेमा के बेहतरी खातिर आपनो ख्याल राखल भुला गइल बाड़न. तबहिये नु पिछला दिने गोरखपुर में हो रहल भोजपुरी फिल्म गुण्डईराज के शूटिंग खातिर ऊ रात भर जागल रह गइले आ अगिला दिने फजीरही से फेरु शूटिंग कइलन.

प्रमेचंद प्रोडक्शन का बैनर में बनत एह फिल्म के शूटिंग होटल बॉबिना में करावल जात रहे जवन कि राते खातिर उपलब्ध रहे. सबेरे फेर एघो गानो शूट करे के रहे. निर्माता प्रेमचंद झा आ निर्देशक रविभूषण जब एह समस्या के जानकारी दिहलन त पवन सिंह बिना हीलाहवाली के तइयार हो गइले आ रात सात बजे से सबेर छह बजे ले शूटिंग कइलन.

शूटिंग के खास बात एगो फाइट सीक्वेंस रहुवे जवना के बालीवुड के मशहूर फाइट मास्टर महेन्द्र वर्मा कंपोज कइले रहले. एह सीक्वेंस में पवन सिंह कई गो केबल सीन दिहल आ समूचा फाइट के जियतार बना दिहले. अगिला दिने फेर नौ बजे शूटिंग खातिर तईयार हो के चहुँपल पवन सिंह के प्रशंसा करत प्रेमचंद झा कहले कि पवन सिंह बेहद मेहनती आ अपना फिल्म पर पूरा ध्यान देबे वाला स्टार हउवन. प्रेमचंद झा निर्माता साजिद नाडियाडवाला कके साथ पिछला दस साल से जुड़ल बाड़न.

गुण्डईराज में पवन सिंह आ मोनालिसा का साथ मनोज टाइगर, विक्रांत सिंह, श्रीकंकना, अनिल यादव, रीना रानी आ दिली सिन्हा बाड़े. गीत संगीत विनय बिहारी के आ कहानी रविभूषण के हऽ.

(स्रोत : प्रशान्त निशान्त )