भोजपुरी फ़िल्म निर्माण आ फाइनेन्स में अगुआ कंपनी सी पी आई मूवीज के सर्वेसर्वा सुजीत तिवारी के कहना बा कि हाल का कुछेक बरीसन में भोजपुरी फिलिमन के खराब हालत ला भोजपुरी सिनेमा से जुड़ले लोग जिम्मेदार बा. आ एह हालात में सुधार तबहिए हो पाई जन जनता के जगावल जाई.
सात फरवरी के रिलीज़ होखे वाला फिलिम “प्रतिज्ञा २” के उदाहरण देत सुजीत तिवारी कहलन कि एह फिलिम के जानकारी देबे ला उ बड़हन हि्दी फिलिम, “धूम ३” अउर “जय हो”, के सहारा लिहलन आ एह फिलिमन का साथे अपना फिलिम के ट्रेलर जारी कइलन. एकरे नतीजा ह कि आजु बिहार के सिनेमा हॉल मालिकन में एह फिलिम के जबर्दस्त क्रेज़ बन गइल बा आ उ बढ़िया दाम देबे ला तइयार बाड़े.
सुजीत तिवारी कहलन कि पब्लिसिटी कवनो फिलिम के सफलता ला अहम होला बाकिर भोजपुरी फिलिम निर्माता एह बात प धेयान ना देसु. दुख होला कि फिलिम रिलीजो हो जाले आ देखेवालन के पतो ना लागे. कहलन कि भोजपुरी निर्माता निर्देशकन के चाहीं कि हर ओह माध्यम के इस्तेमाल करसु जवना से दर्थकन ले फिलिम के बारे मे जानकारी दीहल जा सके. फिल्मो के बारे में पता चले. जहाँ ले मेहरारूवन के भोजपुरी फिलिमन से अलगाव के सवाल बा त ओकरा ला फूहड़ फिलिम जिम्मेदार बाड़ी सँ जवन भोजपुरी सिनेमा के बदनाम क दिहली सँ. कुछ सड़ल मछरियन का चलते पूरा तालाब गंदा लागे लागल बा. एहसे बढ़िया फिलिम बनावे वाला निर्माता निर्देशकन के चाहीं कि जनता के जगावसु आ अपना फिलिमन के बढ़िया होखे के जानकारी देसु.
(उदय भगत)
