चंचल चितवन, मधुर मुस्कान आ खनकत आवाज़ के धनी गुंजन पन्त के भोजपुरी सिनेमा में सफल अभिनेत्री मानल जाला. अपना पसंद का हिसाब से गुंजन कमे बाकिर बढ़िया आ नारी सम्मान वाली फिलिमे में काम करेली.
पिछला साल के सफल आ यादगार फिलिम ‘लक्ष्मण रेखा’ में गुंजन पन्त के किरदार लोग आजुओ नइखे भुलाइल. उ किरदार एगो घरेलू औरत के रहुवे जे एहु जमाना में अनपढ़ रहुवे आ आधुनिकता के चमक दमक से कोसो दूर. उ संस्कारवान आ गुणवान महिला कइसे आपन घर परिवार संभारत नारी के आन बान शान खातिर मंत्री बन के असामाजिक लोगन के खात्मा कइलसि.
अब बात कइल जाव ‘भईल तोहरा से प्यार – आई लव यू’ के त एह फिलिम में गुंजन पन्त गाँव के चुलबुली आ सिधवा लड़िकी के किरदार में बाड़ी. इहो किरदार लोग ढेर दिन ले याद राखी. नायक बाड़न विनय आनंद, निर्माता धर्मेन्द्र मौर्या आ निर्देशक शाद कुमार.
(रामचंद्र यादव)
