भोजपुरी फिल्म साँवरिया आई लव यू का बनारस में हो रहल शूटिंग का दौरान चर्चित अदाकारा रानी चटर्जी घवाहिल हो गइली. सीन का अनुसार बाल्टी में भरल रंग फेंके का दौरान बाल्टिये फेंका गइल आ रानी के माथ फोड़ दिहलस. तुरते उनका के बगल के एगो प्राइवेट अस्पताल ले जाके मरहम पट्टी करवावल गइल आ लवटि के रानी चटर्जी ओह सीन के पूरो कर दिहली.
निर्माता शंभू पांडे आ सीबी त्रिपाठी के एह फिल्म में रानी के नायक बाड़न सुपर स्टार विनय आनन्द. रानी के अस्पताल ले जाये में उनकर तेजी देखले बनत रहे. निर्देशक रामपाल सिंह कहलें कि रानी वाकई दिलेर बाड़ी. बतावत चलीं कि रानी भोजपुरी सिनेमा के अइसन अदाकारा हई जे फिल्म दिमाग से बेसी दिल से करेली. एही महीना मुंबई में रीना एस पासी के बनावल फिल्म भईया के ससुरारी में रिलीज होखे जा रहल बा जवना में रानी के अदाकारी जलजला ले आ दी. राजकुमार आर पांडे निर्देशित एह फिल्म में रानी के नायक बारे बिरहा सम्राट विजय लाल यादव. रानी के एगो अउरी फिल्म पायल ओ बन के तइयार बिया जवना के निर्माता जीतेन्द्र प्रताप सिंह, निर्देशक नंद किशोर महतो आ नायक विक्रांत सिंह बाड़न जा.
कहल जा रहल बा कि एह तीनो फिल्म से रानी के कैरियर अउरी ऊँचाई ध ली.
(स्रोत : शशिकान्त सिंह )