काल्हु बुध का दिने बलिया के तहसीली स्कूल में एगो अद्भुत खगोलीय घटना देखावे के इन्तजाम बलिया के जिला विज्ञान क्लब का ओर से करावल जा रहल बा.
बुध के सँझिया करीब पौने पाँच बजे से पौने सात बजे का बीच एह दृश्य के देखल जा सकी. जिला विज्ञान क्लब के समन्यवक सुधीर कुमार सिंह आ सह समन्वयक रजनीकांत सिंह एह बात के जानकारी देत बतवलें कि सूरज आ धरती का बीच से बुध के पार करे के घटना कई कई बरीस बाद होखल करेला. आ चूंकि बुध के आकार बहुते छोट होला एह चलते सूरज पर महज एगो छोट बिन्दी जिसन लउकेला बुध.
बाकिर सभका के खबरदार कइलो जरुरी बा कि सूरज के कबो खाली आँखि ना देखे के चाहीं ना त आन्हर हो जाए के पूरा अनेसा रहेला.
तहसीली स्कूल में एह मौका पर मुख्य अतिथि रहीहें बीएसए डॉ. राकेश सिंह आ हर आदमी के एगो स्पेशल चश्मा दीहल जाई जवना से एह दृश्य के बिना कवनो खतरा देखल जा सकी.
खबरदार –
कवनो दोसरा तरीका से एह घटना के देखे के कोशिश मत करे केहु.
