टूजी स्पेक्ट्रम घोटाला में आरोपी का रूप में तिहाड़ जेल में बन्द पूर्व दूरसंचारमंत्री ए॰राजा काल्हु अदालत में अपना बयान में प्रधानमंत्री मनमोहन सिंह समेत सगरी पुरनका दूर संचार मंत्रियन के लपेटा में ले लिहलन. उनुका मासूमियत के हद त ई रहल कि कहलन कि उनुका के त पुरस्कार मिले के चाहीं जे दूर संचार सेवा आम आदमी के लायक बना दिहलन. अतना सस्ता करा दिहलन कि आजु सब्जी बेचे वाला आ घर के दाईयन तक का लगे मोबाइल आ गइल बा.
ए॰राजा का बयान का बाद कांग्रेस का तरफ से लीपापोती चालू हो गइल बा आ भाजपा का तरफ से कांग्रेस पर राजनीतिक हमला. कहल जात बा कि जब सगरी कुछ प्रधानमंत्री का जानकारी में भइल त उहो जिम्मेदार बाड़न आ चिदम्बरमो जे वित्त मंत्री का रूप में एह काम के आपन समर्थन दिहले रहलन.
अपना पर लागल आरोप से तिलमिलाइल चिदम्बरम के कहना बा कि चूंकि कुछ आतंकी वारदातन में हिन्दू संगठनन के हाथ होखे के सुबूत मिलल बा आ सरकार ओह मामिलन का जाँच में तेजी ले आइल बिया एह सबसे घबरा के भाजपा वाले उनुका पर आ दोसरा मंत्रियन पर गलत आरोप लगा रहल बाड़े. ई उहे गृहमंत्री हउवन जे मुंबई पर भइल हाल का हमला के कवनो सुबूत आजु ले ना खोजवा पइलन.
