(बुध, 5 अक्टूबर)
- बाढ़ प्रभावित इलाकन में हालात में सुधार अइला के खबर बा. बिहार सरकार बाढ़पीड़ितन खातिर बासठ करोड़ रुपिया आंवटित कइले बिया.
- मंगल के देर रात बिहार के मुख्यमंत्री रहल रामसुंदर दास के पत्नी सविता देवी के पटना में निधन हो गइल.
- पूजा सीजन में दिल्ली आ पटना का बीच हफ्तामें तीन दिन एगो स्पेशल ट्रेन चलावल जाई जवना के पहिला फेर आजु से शुरू हो गइल. नौ तारीख आ तेईस अक्टूबर के हावड़ा खातिर स्पेशल ट्रेन चलावल जाई. भागलपुर आ दिल्ली का बीचो स्पेशल ट्रेन सात, चौदह,इक्कीस आ अट्ठाइस अक्टूबर के चलावल जाई.
- पूर्वी चम्पारण जिला के हरसिद्धी थाना इलाका में बैरियाडीह गाँव के मटकुलुवा घाट पर बुध का फजीरे एगो नाव पलट गइल जवना का बाद तीन लोग डूब के मर गइले. गोविन्दगंज थाना के अरेराज गाँव का लगे एगो वाहन पलटला से दू गो लड़िका कचरा गइले.
- आकाशवाणी पटना के प्रादेशिक समाचार एकांश में संपादकीय सहयोगी आ रिपोर्टर का पैनल में शामिल करे खातिर आवेदन माँगल गइल बा. आवेदक स्नातक आ कवनो मान्यता प्राप्त विश्वविद्यालय से पत्रकारिता में डिग्री आ डिप्लोमा लिहले होखे के चाहीं. आवेदन के अंतिम तारीख तीस अक्टूबर राखल गइल बा.
