भाजपा के हालत कांग्रेस जइसन बनल जात बा जे सत्ता के लोभ में हर तरह के काम कर सकेला. एक जमाना में बलराज मधोक, शंकर सिंह वाघेला, गोविन्दाचार्य, आ कल्याण सिंह जइसन लोग के पार्टी के बाहर के रास्ता देखा चुकल भाजपा आजु एगो भठियरपन के आरोपी मुख्यमंत्री का सोझा तन के खड़ा होत नइखे लउकत.
कर्नाटक के मुख्यमंत्री येदियुरप्पा हर तरह के शर्त लादत चल जात बाड़े आ पार्टी बेबस जइसन लउकत बिया. होखे के त ई चाहत रहे कि भाजपा सत्ता के परवाह कइले बिना हर ओह नेता के पार्टी से बाहर करे के ताकत बनावो. अइसन लोग से अपना निजी हित खातिर पार्टी के बलिदान कइल चाहत बाड़े वइसना लोग के खाना में पड़ल माछी का तरह फेंक देबे के चाहीं. आ अगर बहुते जरुरी होखे त माछी का साथे साथ थरियो फेंक देव. बाकिर ओकरा अइसनका नाजायज दबाव का सोझा निहुरे के ना चाहीं..
