फेलिन का चलते काल्हुए से बिहार में बरखा लागल बा, चार जने के मौत

बिहार मे चक्रवाती तूफान “फेलिन” का असर का चलते लगातार होखत बरखा से दू गो औरत समेत चार जने के मौत हो गइल.
काल्हु सबेरही से होखत बरखा आ तेज हवा का चलते राजधानी पटना के अनेके इलाकन में बिजली नइखे. कुछ जगहा से गाछो गिरला के खबत बा. पटना के सरिस्ताबाद मुहल्ला मे एगो ऊंच पंडाल तेज हवा के झोका से भस गइल.
हाजीपुर से मिलल खबर में बतावल गइल बा कि वैशाली जिला के करताहा इलाका के घटारो गांव मे राजू साह के मकान एगो गाछ गिरला से भस गइल. एह दौरान घर में सूतल तेरह साल के बेटा अमित कुमार आ पन्द्रह साल के बेटी कंचन के दबा के मौत हो गइल. एही घटना में छत्तीस साल के रामचंद्र साह आ अठारह साल के निर्मला कुमारी घवाहिल हो गइल लोग. एह लोग के हाजीपुर सदर अस्पताल मे भरती करावल गइल बा.
अइसहीं गोरौल इलाका के बिरौल गांव मे एगो माटी के घर भसला से पचपन साल के सरस्वती देवी के ओहिजे मौत हो गइल. तेज हवा आ बरखा का चलते वैशाली जिला मे बिजली ठप बा. अउरी कई जगहा से माटी के मकान भसे आ गाछ गिरे के खबर बा.
समस्तीपुर जिला के बाजितपुर गांव मे घर भसला से पचास साल के नथुनी सिंह दबा के मर गइलन.
गोपालगंज से खबर बा कि जादोपुर थाना के मेयरिया गांव मे पाँच गो माटी के घर भस गंइल. दू जने एहसे घवाहिल होके अस्पताल में बरती करावल गइल बाड़े.
मौसम विभाग बतावत बा कि बिहार के लगभग सगरी जिलन में बरखा होखत बा जवन कि आजुओ जारी रहे के अनेसा बा.
काल्हु साँझे से एहिजा बलियो में रुक रुक के लगातार बरखा होखत बा. बिजली ठप बा, इंटरनेट मुश्किल से काम करत बा.
बक्सर जिलाके नुआंव गाँव में दुर्गापूजा पर आयोजित यज्ञशाला में आइल साधु संतन ला बनावल बाँस के झोपड़ियन में से एगो झोपड़ी काल्हु रात भस गइल जवना से ओह में सूतल एगो साधु दबा के मर गइले. पुलिस एह मामिला के जांच करत बिया.
(वार्ता)

Loading

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Scroll Up