एनडीटीवी के मालिकाना हक हासिल करे में कवनो बाधा नइखे

by | Aug 26, 2022 | 0 comments

तीन दिन पहिले के खबर से पुरान खबर पर कबो केहू के धैयाान ना गइल रहुवे जब बारह बरीसन से अधिका समय से रिलायंस समूह से जुड़ल एगो कंपनी एनडीटीवी के पाले पोसे के काम करत रहुवे. आ ई तब से चलल आवत रहुवे जब देश में कांग्रेसी सरकार रहल रहुवे. जब ले बाति तोपाइल लुकाइल रहल तबले ना त केहू के पता चलल ना केहू सवाल उठावल.

अब जब ओह कंपनी के अडानी समूह के एगो कंपनी खरीत लिहलसि त बवाल मच गइल. कहाए लागल कि मीडिया पर व्यावसायिक घराना काबिज होखे के साजिश करत बावे. एनडीटीवी के करजा देबे वाली कंपनी करार करा लिहले रहुवे कि जबे ओकर मन करी तबे ऊ एनडीटीवी के सबले बड़का हिस्सेदार रहे वाली आरआरपीआर के हिस्सा के लगभग 29 फीसदी हिस्सा ले सकी.

अब अडानी समूह के कंपनी करजा देबे वाली कंपनी के खरीद लिहलसि त ऊ सेबी के खबर दे दिहलसि कि ऊ एनडीटीवी के 29 फीसदी के मालिकाना हक हासिल कर लिहले बिया आ अब सेबी के प्रावधानन का अनुसार 26 फीसदी हिस्सा अउरी खरीदे ला खुला ऑफर दे के एनडीटीवी के 55 हिस्सा के मालिक होखे के काम करी.

अब जब बाति फइल गइल, जाने सभ कोई वाला हालात बन गइल त एनडीटीवी का तरफ से कहल गइल कि एगो मामिला में सेबी ओकरा पर रोक लगा दिहले बावे कि एनडीटीवी समूह नवम्बर 2022 ले कवनो तरह के शेयर कारोबार ना कर सके त कंपनी के शेयर ऊ कइसे हस्तांतरित करी. एही खबर पर आजु अडानी समूह का तरफ से बयान आइल बा कि 29 फीसदी हिस्सेदारी हासिल करे पर सेबी के सकार के जरुरते नइखे. ओकर कहना बा कि एनडीटीवी चलावे वाली कंपनी आरआरपीआर के उठावल सवाल बाहियात बाति बा आ ओकर ना त कवनो आधार बा ना कवनो कानूनी तर्क.

एनडीटीवी वालन के कहना बा कि अडानी के एह सौदा का बारे में ना त आरआरपीआर से कवनो बात कइल गइल ना ओकरा के खबर दीहल गइल आ सबकुछ लुकाके कइल गइल बा.

एह खबर का बाद से एनडीटीवी के शेयरन के दाम तेजी से बढ़े लागल बा. बाकिर एहमें नया निवेश करे से पहिले दस बेर सोचला के जरुरत बा. ट्वीटर समूह के मालिकाना हक खरीदे के टेस्ला समूह के कोशिश आज कवना मुकाम पर बा ई हमेशा धेयान में राखे के चाही.

शेयर बाजार से जुड़ल खबरन में देश के विदेशी मुद्रा भंडार में कमी होख आ डॉलर का मुकाबले रुपिया में आठ पइसा मजबूती के खबर बा. शेयर बाजार में आजु मामूली तेजी देखे के मिलल आ बीएसई सूचकांक 59 अंक चढ़ि के 58833.87 अंक पर आ निफ्टीफिफ्टी 36 अंक बढ़ि के 17668.90 अंक पर बंद भइल. सोना चांदी का बाजार में आजु गिरावट के दिन रहल.

Loading

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.

Scroll Up