बिहार में फिलिम सिटी बनावे के माँग एक जमाना से रहि रहि के उठत रहेला. कबो रवि किशन बात उठावेलें त कबो मनोज तिवारी त कबो केहू अउर. अब मशहूर बॉलीवुड अभिनेता मनोज बाजपेई माँग उठवले बाड़न कि बिहार में एगो फिलिम सिटी बनावल जाव जेहसे एहिजा के कलाकारन आ तकनीशियन के काम करे के मौका मिल सके. साथ ही कहलन फिलिमन के पायरेसी रोके खातिर हर राज्य के कदम उठावे क चाहीं. अबहीं हाल ई बा कि लोग सीडी पर फिलिम देखे के आदत बना लिहले बा आ एह चलते सिनेमाघर बन्द होखल जात बाड़ी सँ. मनोज बाजपेई के ई साक्षात्कार दैनिक जागरण में छपल बा.
भोजपुरी सिनेमा में अबहीं ले काम ना करे का सवाल पर मनोज बाजपेई के कहना रहल कि अबहीं ले कवनो स्क्रिप्ट अइसन ना मिलल जवना के सकारल जाव. अगर बढ़िया स्क्रिप्ट मिलल त जरूर भोजपुरीओ फिलिमन में काम करीहें.
