संविधान के आठवीं अनुसूची में भोजपुरी के शामिल करावे खातिर बरीसन से आन्दोलन हो रहल बा, मांग कइल जा रहल बा. बाकिर भईंस का आगे बीन बजावे भईंस खड़ी पगुराय वाला हालात बनि गइल बा. जब गरज पड़ल भा मौका देखि के नरेन्द्रो मोदी ले आश्वासन दिहले रहलें कि भाजपा सत्ता में आई त भोजपुरी के संविधान का आठवीं अनुसूची में शामिल करा दी. समय निकल गइल मकसद निकल गइल त कवन भोजपुरी, कईसन आश्वासन !
एगो दाढ़ी बाबा रहलन. रहलन त बलिया के बाकिर उनुका भोजपुरी इयाद ना पड़ल आ डोगरी भासा के एह अनुसूची में शामिल करा दिहलन. अब कहे वाला कहत रहे कि एकरा पीछे एगो मेहरारु के मेहनत रहल. ओकरे कहना मानि के ऊ ई मान्यता दिअवा दिहलन भोजपुरी के.
हर साल संसद के मानसून सत्र शुरु होखे बेरा दिल्ली के जंतर-मंतर पर भोजपुरिया आपन धरना देत रहेलें. अलग बाति बा कि ओह धरना के देखे-सुने ला भा आपन समर्थन जतावेला भाजपा के कवनो बड़ नेता त दूर, छूटभइयनो के दर्शन ना होखेला. का अबकी उमीद कइल जाव कि भोजपुरी सिनेमा से नाम आ रुपिया कमा चुकल आ एहघरी सत्ता सुख भोगत भोजपुरी सिनेमा के तीन गो सुपरस्टार मनोज तिवारी, रविकिशन शुक्ला, अउर दिनेश लाल निरहुआ एह मौका पर आ के भोजपुरियन के हिम्मत बढ़इहें आ सरकारो पर दबाव बनवइहें कि भोजपुरी मान्यता के बरीसन पुरान मांग पूरा क दीहल जाव.
भोजपुरी जन जागरण अभियान, नई दिल्ली के अध्यक्ष डॉ. संतोष पटेल सभे भोजपुरियन से हथजोरी निहोरा कइले बाड़न कि संसद के मानसून सत्र 11 अगस्त, 2023 से चले जा रहल बा आ एह मौका पर भोजपुरी जन जागरण अभियान के 19 वां धरना दिल्ली के जंतर मंतर पर अतवार, 06 अगस्त 2023 के 11 बजे दिन से दुपहरिया 3 बजे ले होखे जा रहल बा. एह शांतिपूर्ण धरना में उपस्थित होके आपन भागीदारी सुनिश्चित करीं आ भोजपुरी भासा के संविधान के आठवीं अनुसूची में दर्ज करावे खातिर तन मन धन से सहयोग दिहीं सभे. एह आन्दोलन के धार देबे ला अजोरियो का तरफ से निहोर बा कि एह आन्दोलन में तन-मन-धन से शामिल होखीं सभे. समर्थन आ सहजोग देबे ला रउरा डॉ. संतोष पटेल से मोबाइल 9868152874 पर संपर्क कर सकीलें.
