भोजपुरी सिनेमा के अकेल इंटरनेशनल फिल्म फेस्टीवल अबकी मलेशिया में 21 जुलाई 2018 के होखे जा रहल बा.
एह अवार्ड समारोह के जानकारी देत यशी फिल्म्स के अभय सिन्हा बतवलें कि एह अवार्ड समारोह में भोजपुरी मेगास्टार मनोज तिवारी, हिन्दी फिल्मों के सुनील शेट्टी, भोजपुरी सुपरस्टार रविकिशन, दिनेशलाल यादव निरहुआ, पवन सिंह, खेसारीलाल यादव, विनय आनंद, कृष्णा अभिषेक, अरविन्द अकेला कल्लू, रितेश पांडे, मधु शर्मा, मोनालिशा, आम्रपाली दुबे, अक्षरा सिंह, पायल रोहतगी, शिविका दिवान, श्यामली, शुभी शर्मा, राकेश मिश्रा अउर राजीव मिश्रा समेत अनेके लोग शिरकत करी. एह मौका पर भोजपुरी सिनेमा में योगदान देबे वाला कुछ खास अतिथियन के सम्मानो कइल जाई. साथही सबले नीक फिलिम आ कलाकार अउर टेक्निशियनो के सम्मान कइल जाई. समारोह में मलेशिया सरकार के आ भारत के कुछ बहुते खासो अतिथि शामिल होखिहें.
अभय सिन्हा कहलन कि भोजपुरी में बहुत बढ़ियो फिलिम बनेली सँ बाकिर भोजपुरी सिनेमा अउरी गीत गवनई लेके अइसन बदनाम क दीहल गइल बा कि नीमन काम ओह हवा में देखा सुना नइखे पावत. कहलन कि एही माहौल को सुधारे बदे एह अवार्ड समारोह का जरिए भोजपुरी सिनेमा के नीमनका रुप देखावल जाई.
जान जाईं कि विदेश में भोजपुरी सिनेमा के अन्तर्राष्ट्रीय अवार्ड समारोह के शुरुआत क के भोजपुरी सिनेमा के सितारनके दूर देश ले जा के सम्मानित करवलें. भोजपुरी सिनेमा के पहिलका अन्तर्राष्ट्रीय अवार्ड समारोह मॉरीशस में करावल गइर रहुवे आ ओकरा बाद दुबई में. पिछला साल एकर आयोजन लंदन में कइल गइल आ अब भोजपुरी सिनेमा के चउथका अन्तर्राष्ट्रीय अवार्ड समारोह मलेशिया में आयोजित कइल जा रहल बा.
भोजपुरी सिनेमा के अन्तर्राष्ट्रीय अवार्ड समारोह भोजपुरी के आवाज गाँव देहात से उठा के सात समन्दर पार ले जाके एकरा के चर्चित करा दिहल गइल बा आ भोजपुरी दुनिया के विस्तार करत एकरा के अन्तर्राष्ट्रीय मंच प्रदान कइल गइल बा.
एह अवार्ड समारोह ले के भोजपुरी सिनेमा इंडस्ट्री में उछाह के माहौल बा.
(शशिकान्त सिंह)
