कइसे रहब, तोर बिन ए संघतिया
-मंतोष कुमार सिंह
जात रहनी बहरा, रुआंसु भइल अंखिया
कइसे रहब, तोर बिन ए संघतिया।।
माई छुटली, बाप अउरी घरवा दुअरिया
जिनगी अन्हार भइल, गइल अंजोरिया
जिया में डसेला, परदेस वाली रतिया
कइसे रहब, तोर बिन ए संघतिया।।
गंउवा के खेतवा में, बइठे ना कोयलिया
सरसो ना जौ, गेंहू, लौउके ना बलिया
चारू ओर पसरल बा, दिन में अन्हरिया
कइसे रहब, तोर बिन ए संघतिया।।
शादी-बियाह में लौउके नाहीं डोली
छठ, जिऊतिया, तीज होखे नाहीं होली
फुरसत ना बा इंहा, बाटे ना बटोहिया
कइसे रहब, तोर बिन ए संघतिया।।
मन नाहीं लागताऽ, लिखऽतानी पतिया
हमके भेजा दऽ यार, गंवई से गडिय़ा
अब ना सहाताऽ, परदेस में दरदिया
कइसे रहब, तोर बिन ए संघतिया।।
लेखक पत्रकार अउरी गीतकार हईं
स्थाई पता:-
ग्राम- बावनपाली बासुदेव, पोस्ट- इसरौली, जिला- देवरिया (उत्तरप्रदेश)
वर्तमान पता-
400-9 बी, साकेत नगर, भोपाल (मध्यप्रदेश)
मोबाइल-09406047658
ईमेल-mantosh11@gmail.com
