बिहार आ यूपी के खबर –
- चंदौली के सदर कोतवाली इलाका में आजु शुक का दिने ट्रेन से कटा के एगो बूढ़ के मौत हो गइल.
- उत्तर प्रदेश लोक सेवा आयोग से चुनाइल 2001 एमबीबीएस डाक्टरन से आपन पसंदीदा जिला बतावे के कहल गइल बा. सूची विभागीय वेबसाइट पर मौजूद बा.
- सारण जिला के तरैया इलाका के भदौरा गांव से पुलिस लाखो रुपिया के लूटल ड्राइफ्रूट बरामद कइलसि.
- इलाहाबाद उच्च न्यायालय वाराणसी जिला में अबकिओ का दुर्गापूजा के बाद गंगा में मूर्ति बहावे के मंजूरी दे दिहलसि.
- 3 अक्टूबर से पाटलिपुत्र टीसन चालू होखेवाला बा. चालू हो गइला पर राजेंद्रनगर आ पटना जंक्सन से दिल्ली, मुंबई, चेन्नई जाए वाली गाड़ियन के एहिजा से चलावल जाई जवना से पटना जंक्सन पर भीड़ में कमी हो सकी.
- पाटलिपुत्र टीसन चालू होखे के खबर सुनते जलालपुर गाँव के लोग रेलवे टै्रक जाम क के धरना दिहल. एह लोग के माँग बा कि पहिले जलालपुर जाए वाली सड़क आ नाला बनावल जाए आ गाँव का सोझा रेलवे क्रासिंग बने.
- उत्तर प्रदेश सरकार सहारनपुर के कुतुबशेर इलाका में पिछला 25-26 जुलाई के रात भइल दंगा के मुख्य आरोपी मोहर्रम अली उर्फ पप्पू पर रासुका लगा दिहले बिया.
- इलाहाबाद के नवाबगंज इलाका में शुक का दिने एगो नीली बत्ती लगवले बोलेरो से आइल बदमाश एगो शराब व्यवसायी के कैशियर से एक करोड साठ लाख रुपिया लूट के चल दिहले.
- जौनपुर के नगर कोतवाली इलाका में एगो नीम पेड पर जल चढावे आ ओहिजा पूजा करे से रोके का झगड़ा में एगो महाविद्यालय के प्राचार्य समेत दी जने के गिरफ्तार क लिहल गइल.
- कैमूर के भभुआ, मोहनिया, कुदरा, चैनपुर, आ रामगढ़ में यूरिया खाद ना मिलला से परेशान किसान प्रदर्शन कइले.
- रोहतास के करगहर में एगो सड़क हादसा में एगो लड़िका के मौत हो गइल. एकरा विरोध में लोग कुछ देर खातिर सड़क जाम क दिहल.
- हाजीपुर से राघोपुर प्रखंड के प्रखंड विकास पदाधिकारी विनोद कुमार के गाड़ी चालक के उनुका नाम पर घूस लेत पुलिस ध लिहलसि.
- पुरनका लखनऊ में शिया सुन्नी झगड़ा में लिखल एफआईआर रद्द करे के निहोरा खारिज क दिहलसि हाई कोर्ट.
- बिहार राज्य सतर्कता अन्वेषण ब्यूरो आजु भोजपुर जिला मध्याह्व भोजन कार्यालय के एगो लेखापाल के 20 हजार रूपिया घूस लेत रंगे हाथ ध लिहलसि.
- लखनऊ मेट्रो रेल परियोजना अमौसी हवाई अड्डा से इन्दिरानगर के मुंशी पुलिया तक ले बनावल जाई. 20 किमी के ई रेल लाईन तीन चरण में बनावल जाई आ पहिला चरण साल 2016 ले पूरा क लिहल जाई.
- सारण जिला के दिघवारा थाना के पालीगंज में भारतीय स्टेट बैंक की पालीगंज शाखा के ग्राहक सेवा केन्द्र के एगो कर्मचारी के जान ले के लूटेरा दू लाख रूपिय लूट ले गइले.
- उत्तर प्रदेश में सरकारी सहायता लेबे वाला इंटरमीडिएट काॅलेजन में बहाल एडहाॅक शिक्षक लोग के जल्दिए नियमित क दिहल जाई.
- उत्तर प्रदेश का गोण्डा जिला के मोतीगंज इलाका में प्रेम प्रपंच के मामिला में एगो पुजारी के पीट-पीट के मुआ दिहल गइल.
- उत्तर प्रदेश परिवहन निगम के 40 गो लमहर दूर जाए वाला वॉल्वो बस सेवा के 2198 बस के ऑनलाइन टिकट बुकिंग से जोड़ दिहलसि.
आरा, बलिया, छपरा, देवरिया, सिवान, गोपालगंज. सासाराम, रोहतास, बक्सर, कैमूर, पूर्वी चंपारण, पश्चिमी चंपारण, गाजीपुर, मऊ, गोरखपुर, चंदौली, भदोही, वाराणसी, मोतिहारी, बेतिया, जौनपुर वगैरह भोजपुरिया इलाका के खबर भोजपुरी में.
टटको में टटका आज के खबर पढ़ीं…..
0 Comments