आखिर लोहिया के मकान कहाँ बा?

समाजवाद के पुरोधा मानल जाए वाला डा. राममनोहर लोहिया के आपन आदर्श माने वाली उत्तर प्रदेश के सपा सरकार भलही अनेके योजना लोहिया का नाम पर चलावत होखो ओकरा अबही ले ई पता नइखे कि आखिर लोहिया के मकान कहाँ बा!
डा॰ लोहिया के जनम तब के अविभाजित फैजाबाद जिला के अकबरपुर के शहजादपुर मोहल्ला मे भइल रहे. आजु उनकर 46वीं पुण्यतिथि ह. सपा अध्यक्ष मुलायम सिंह यादव डा॰ लोहिया के आपन आदर्श मानेले लेकिन सूबा में चार बेर आपन सरकार बना बनवा चुकला का बादो पता ना लगा पवले कि लोहिया के मकान कहाँ बा.
डा॰ लोहिया साल 1915 मे अकबरपुर के टंडन पाठशाला से प्राथमिक शिक्षा हासिल कइले आ विशेश्वरनाथ हाईस्कूल अकबरपुर से मिडिल के शिक्षा साल 1920 मे. समाजवाद के सेनापति कहल जाए वाला डा॰ लोहिया के शहजादपुर के अनुयायी बतावेले कि उनुका जन्मस्थली पर अब एगो मार्केट बन गइल बा.
शहजादपुर मे एगो मूर्ति के अलावा डा॰ लोहिया के नाम से शायद कुछउ नइखे. अकबरपुर के अम्बेडकरनगर नाँव से मायावती अपना मुख्यमंत्रित्वकाल मे जिला बना दिहली जबकि डा॰ लोहिया के नाम से अकबरपुर के जिला बनावे के माँग मुलायम सिंह यादव के पहिलके मुख्यमंत्रित्वकाल 1989 से शुरु हो गइल रहे.
(वार्ता)