चारा घोटाला मे लालू के साझेदार रहले नीतीश, कहलन सुशील मोदी

बिहार के उप मुख्यमंत्री रहल आ भाजपा के वरिष्ठ नेता सुशील कुमार मोदी मुख्यमंत्री नीतीश कुमार आ उनुका पार्टी जदयू के सांसद शिवानंद तिवारी पर अरबो रूपिया के चारा घोटाले मे सनाइल होखे के आरोप लगावत दुनु जने का खिलाफ मुकदमा चलावे के माँग कइले.
चारा घोटाला के सीबीआई जांच करावे खातिर पटना उच्च न्यायालय मे याचिका दायर करे वालन में शामिल रहल सुशील मोदी आजु एगो संवाददाता सम्मेलन मे कहलन कि नीतीश कुमार साल 95 के विधानसभा चुनाव का समय चारा घोटाला के मुख्य अभियुक्त श्याम बिहारी सिन्हा से एक करोड़ रूपिया लिहले रहले. अइसही शिवानन्द तिवारीओ चारा घोटाला के आरोपियन से कई बेर लाखो रूपिया लिहले रहन.
ई बात घोटाला के मुख्य अभियुक्त श्याम बिहारी सिंहा अपना इकबालिया बयान ममें पुलिस का सोझा सकरले बाड़े. उनकर कहना बा कि नीतीश खातिर एक करोड़ रूपिया विजय कुमार मलिक के दिहल गइल रहे जवन उमेश सिंह के मार्फत नीतीश कुमार के दीहल गइल रही. नीतीश कुमार फोन करके बतवलहू रहले कि रुपिया मिल गइल बा आ उमेद जतवले रहुवन कि आगहू अइसही मदद मिलत रही.
भाजपा नेता सुशील मोदी कहलन कि जदयू सांसद शिवानंद तिवारीओ के चारा घाटाला के अभियुक्तन का तरफ से तीस पैंतीस लाख रुपिया दीहल गइल रहे. तिवारी पचास लाख मँगले रहले कि मिल गइला पर ऊ उच्च न्यायालय मे याचिका दायर ना करीहे.
मोदी कहलन कि श्याम बिहारी सिन्हा आ चारा घोटाला के अउरियो आरोपी सकरले बाड़े कि नीतीश कुमार आ शिवानंद तिवारी के कई मौका पर लाखो रुपिया दीहले रहे लोग. एहसे एह मामिला में एहू दुनु जने पर मुकदमा चलावे के चाहीं.
(वार्ता)