फिजी का राष्ट्रीय विश्वविद्यालय में फिजी के सामाजिक कार्यकर्ता लोगन से बतियावत भारत के प्रधानमंत्री नरेन्द्र मोदी.
- केन्द्र सरकार साफ कह दिहलसि के लोकसेवा आयोग के परीक्षा खातिर उमिर घटावे के कवनो प्रस्ताव पर विचार नइखे होखत. ई बात तब साफ करे के पड़ल जब हवा उड़े लागल कि भाजपा सरकार यूपीए सरकार के उमिर घटावे के फैसला मान ली. पिछला मनमोहन सरकार अधिकतम उमिर में चार साल के कटौती करे के बात कहले रहुवे.
- वाराणसी के जगतपुर डिग्री काॅलेज में चलत सेना बहाली मेला में बुध का दिने चंदौली के चहनिया गाँव के अभिषेक यादव के गिरफ्तार क लिहल गइल. ओकरा पर आरोप बा कि उ असफल प्रतिभागियन के बहाली करावे का नाम पर दलाली करत रहुवे. अभिषेक का संगे दू गो अउर दलाल रहले सँ जवन मौका देखते भाग परइले सँ. बुध का दिने मऊ के नवहियन के बहाली होखे के दिन रहे आ एगो नवही नशा के इंजेक्शन लगा के दउड़त धरा गइल.
- बेर बेर अपना बकवास से चरचा में आ जाए वाला बिहार के मुख्यमंत्री जीतन राम माँझी अब देश के पीएम बने के सपना देखे लागल बाड़न. बुध का दिने बिहार से केन्द्र में मंत्री बनल सात जने के धमकावत कहलन कि अगर बिहार के मिले वाला धन में कवनो तरह के कटौती भइल त ओह लोग के बिहार में घुसे ना दीहें.
- आईसीएसई अपना परीक्षा के दिन घोषित क दिहलसि. एह बोर्ड के परीक्षा 27 फरवरी से शुरू होखी. आईएससी के परीक्षा 18 फरवरी से शुरु होखी.
- विदेश यात्रा के अपना आखिरी पड़ाव पर फिजी चहुँपल पीएम नरेन्द्र मोदी फिजी के करीब 500 करोड़ रुपिया के सहायता देबे के आ फिजी में रहे वाला भारतीयन के भारत उतरते वीजा देबे के एलान कइलन. कहलन कि फिजी के चाहीं कि बालीवुड के नेवतसि शूटिंग करे ला जवना से पर्यटन के बढ़ावा मिली.
- छपरा में उत्तर बिहार क्षेत्रीय ग्रामीण बैंक के बिशनपुर शाखा से नौ लाख रुपिया बैंक में सेन्ह मार के चोरा लिहल गइल. कैश बाक्स काटे खातिर गैस कटर के इस्तेमाल कइलन स चोर.
- इलाहाबाद में चलत अखिल भारतीय इंदिरा मैराथन में बुध का दिने गाजीपुर आ भदोही के दबदबा देखे के मिलल. गाजीपुर के लालजी यादव पहिला जगहा रहलन जबकि महिला वर्ग में महाराष्ट्र के ज्योति शंकर गवते विजेता बनली. पिछलो साल के विजेता रहली ज्योति.
- बुध का साँझ भटौली घाट पर भोजपुरी फिलिम के शूटिंग का दौरान रवि किशन घवाहिल हो गइलन जवना का बाद शूटिंग रोक देबे के पड़ल. मिर्जापुर के कछवां में ‘पंडित जी बताईं बियाह कहिया होई’ के शूटिंग का दौरान रविकिशन के गोड़ मुचुक गइल जवना का बाद उनुका के वाराणसी ले जाइल गइल.
- गाजीपुर के कन्हैया रेलवे में शटिग पायलट का पद पर काम करत रहलें. बुध का भोर में ट्रेन में इंजन लगा के पैदल लवटत घरी ऊ एगो मालगाड़ी के चपेटा में आ गइलन आ ओहिजे उनकर मौत हो गइल.
- बक्सर में बियफे का दिन से नौ दिन ले चले वाला श्रीसीताराम विवाह महोत्सव शुरु होखे वाला बा जवना में बहुते बड़ साधु महात्मा शामिल होखीहें.
- बलिया के निकासीपुर के रहे वाला सिपाही त्रिभुवन सिंह जौनपुर में तैनात रहलन. बुध का भोर में शिवपुर टीसन पर चलत रेलगाड़ी पर चढ़े का फेर में नीचे गिरला से ऊ ट्रेन से कटा गइलन. वरुणा एक्सप्रेस के टीसन पर ठहराव ना रहुवे बाकिर धीरे जात ट्रेन देख के चढ़े का फेर में हादसा हो गइल.
- संघ के सरकार्यवाह भैयाजी जोशी के यूपी प्रवास 25 नवंबर से पाँच दिन के होखी. बुध का दिने अयोध्या के कारसेवकपुरम में चलत संघ के तीन दिन के चिंतन शिविर में ई तय कइल गइल. चिंतन शिविर बुध का दिने पूरा हो गइल.
- भारत के महिला क्रिकेट टीम बुध का दिने दक्खिन अफ्रीका के एक पारी आ चौंतीस रन से हरा दिहलसि. दुनू देश के टीम का बीच इहे एगो टेस्ट मैच होखे वाला रहल.
भा
सहयोग भेजला का बाद आपन एगो फोटो आ परिचय
18 जुलाई 2023
24 अप्रैल 2024
0 Comments